کوئٹہ،04 جون (اے پی پی):بلوچستان حکومت کی جانب سے یونیورسٹی ملازمین کی تنخواہ جاری کرنے کے اعلان کے بعد اساتذہ نے 90 روز سے جاری دھرنا ختم کر دیا۔منگل کو صوبائی وزیر تعلیم راحیلہ حمید درانی بلوچستان یونیورسٹی کے ملازمین کی تنخواہوں کی عدم ادائیگی کے خلاف قائم احتجاجی دھرنے میں پہنچ گئیں، جہاں انہوں نے اساتذہ سے مذاکرات کئےجس کے بعد اساتذہ نے دھرنا ختم کرنے کا اعلان کردیا ۔
صوبائی وزیر نے کہا کہ مجھے افسوس ہے کہ میرے اساتذہ کلاسوں کے بجائے سڑکوں پر تھے،میں ملازمین کو جون تک کی تنخواہوں کی ادائیگی کا اعلان کرتی ہوں۔انہوں نے کہا کہ ملازمین کو تنخواہوں کہ حصول کے لیے سڑکوں پر نہیں آنا چاہیے، تنخواہ دار طبقے کا گھر تنخواہ پر ہی چلتا ہے، میری خواہش ہے کہ اساتذہ کے تمام مسائل حل ہوں۔انہوں نے کہا کہ وزیر اعلیٰ بلوچستان سرفراز بگٹی اور صوبائی وزیر خزانہ شعیب نوشیروانی کی کاوشوں سے یونیورسٹی ملازمین کے واجبات ادا ہورہے ہیں، کوشش ہے کہ آئندہ بجٹ میں جامعات کے اساتذہ کےلیے پورے سال کی رقم مختص ہو، جامعات کے اساتذہ کے مسائل کا مستقل حل چاہتے ہیں۔
