اسلام آباد، 05جون (اے پی پی): وفاقی وزیرداخلہ و انسداد منشیات محسن نقوی اور وفاقی وزیر اوورسیزپاکستانیز چودھری سالک حسین کی اطالوی وزیر داخلہ میٹیو پینٹے ڈوسی سے روم میں ملاقات ہوئی۔ اٹلی کی وزارت داخلہ آمد پر اطالوی وزارت داخلہ کے اعلیٰ حکام نے وفاقی وزراء کا پرتپاک خیر مقدم کیا۔
دوران ملاقات غیر قانونی امیگریشن اور انسانی سمگلنگ روکنے کے لئے مشترکہ اقدامات پر تبادلہ خیال کیا گیا،انسداد منشیات اور بارڈر سیکورٹی کے حوالے سے تعاون پر بھی تفصیلی بات چیت ہوئی اس کے علاوہ غیر قانونی تارکین وطن اور انسانی سمگلنگ کیخلاف مربوط اور موثر لائحہ عمل پر اتفاق ہوا۔دونوں وزارت کے درمیان انسداد منشیات اور بارڈر سیکورٹی کے لئے مشترکہ اقدامات اٹھائے جائیں گے۔
ملاقات میں مشترکہ طور پر قریبی کوآرڈینیشن کے تحت کام کرنے کا فیصلہ کیا گیا۔انسداد منشیات اور انسانی سمگلنگ روکنے کےلئے اٹلی کا پاکستانی بارڈرز کو محفوظ بنانے کیلئے معاونت پر غور کر رہی ہے اور اطالوی ٹیم اس ضمن میں جلد پاکستان کا دورہ کرے گی۔وفاقی وزیرداخلہ محسن نقوی نے اٹلی میں قید 146 پاکستانیوں کے حوالے سے بھی بات کیانہوں نے نے 42 پاکستانی قیدیوں کو پاکستان کے حوالے کرنے کا مطالبہ کیا۔
