اسلام آباد، 05 جون (اے پی پی): صدر مملکت آصف علی زرداری نے بدھ کے روز قائداعظم یونیورسٹی اسلام آباد کے وائس چانسلر پروفیسر ڈاکٹر نیاز احمد اختر سے ملاقات میں ٹیکنالوجی ہائی ویز بنانے کیلئے طلباء کی انفارمیشن ٹیکنالوجی کے بنیادی ڈھانچے تک رسائی پر زور دیا۔
صدر مملکت نے کہا کہ طلباء کو لیپ ٹاپ فراہم کرنے سے انکی تعلیم تک رسائی بڑھے گی، ڈیجیٹل تقسیم ختم ہوگی، اسکے علاوہ ملکی تعلیمی پروگرام مضبوط بنانے اور طلباء کو ٹیکنالوجی میں جدید مہارتوں سے آراستہ کرنے کی ضرورت ہے تاکہ وہ قومی اور بین الاقوامی منڈیوں میں مقابلہ کر سکیں۔
صدر مملکت نے کہا کہ جامعات ہنر مند پیشہ ور افراد پیدا کرنے میں اہم کردار ادا کرتی ہیں ، پاکستان کو ڈاکٹرز ، انجینئرز، نرسوں اور اساتذہ جیسے مزید پیشہ ور افراد پیدا کرنے، طلباء کی کردار سازی اور تعلیمی معیار مزید بہتر بنانے کی ضرورت ہے۔صدر مملکت نے طلباء کی حوصلہ افزائی کیلئے قائد اعظم یونیورسٹی کے پوزیشن ہولڈرز کو نقد صدارتی ایوارڈز دینے کی ہدایت کی۔قائد اعظم یونیورسٹی کے وائس چانسلر نے صدر مملکت کو یونیورسٹی کے تعلیمی پروگراموں اور دیگر انتظامی امور بارے آگاہ کرتے ہوئے بتایا کہ ڈیجیٹلائزیشن قائد اعظم یونیورسٹی کی اولین ترجیح ہے۔
صدر مملکت نے پاکستان کے تعلیمی شعبے میں یونیورسٹی کے کردار کو سراہتے ہوئے وائس چانسلر کو یونیورسٹی کے مالی مسائل کو مناسب فورم کے ذریعے حل کرانے میں اپنے تعاون کا یقین دلایا۔
