اسلام آباد،5جون (اے پی پی):صدر مملکت آصف علی زرداری نے پاک-اردن تعلقات کو مزید مستحکم بنانے کی ضرورت پر زور دیتے ہوئے کہا ہے کہ پاکستان اور اردن کے مابین قریبی برادرانہ تعلقات ہیں۔ صدر مملکت نے ان خیالات کا اظہار پاکستان میں اردن کے سفیر ڈاکٹر معین خراست سے گفتگو کرتے ہوئے کیا ۔ جنہوں نے بدھ کو یہاں ایوان صدر میں ان سے ملاقات کی۔ اردن کے سفیر نے صدر مملکت کو 11 جون کو اردن میں غزہ کے بارے میں انسانی امداد پر ہونے والی کانفرنس میں شرکت کی دعوت دی۔ صدر مملکت نے سفیر کو اردن میں ہونے والی کانفرنس میں پاکستان کی جانب سے شرکت کی یقین دہانی کرائی۔ اردن کے سفیر نے اس موقع پر کہا کہ اردن نے فلسطین میں انسانی امداد کی فراہمی کیلئے اخوت فائونڈیشن کے ساتھ مفاہمتی یادداشت پر دستخط کیے ہیں۔ صدر مملکت نے فلسطین میں امداد پہنچانے میں اردن کی کاوشوں کو سراہا۔ سفیر نے صدر آصف علی زرداری کو شاہ اردن کی جانب سے صدر منتخب ہونے پر مبارکباد کا پیغام پہنچایا۔
