اسلام آباد،10جون(اے پی پی): سرکاری سکیم کیلئے پری حج فلائٹ آپریشن کامیابی کے ساتھ آج اختتام پذیر ہو گیا، اسلام آباد سے آنے والی سعودی ایئرکی پرواز نمبر 3727کے ذریعے 380 عازمین کرام جدہ ایئر پورٹ لینڈ کر گئے جبکہ نجی حج سکیم کے ذریعے 70 ہزار عازمینِ حج سعودی عرب پہنچ گئے ، اگلے دو روز میں مزید 20 ہزار پرائیویٹ عازمینِ حج سعودی عرب پہنچیں گے۔
وزارت مذہبی امور کے مطابق سعودی مکاتب کی جانب سے منیٰ اور عرفات میں عازمینِ حج کے 5 روزہ قیام کی تیاریاں مکمل کر لی گئیں ہیں ۔ عازمینِ حج کی وادیِ منیٰ کیلئے روانگی کا آغاز 13 اور 14 جون کی درمیانی شب کو ہو گا ۔
پاکستان حج مشن نے وادیِ منیٰ میں عازمینِ حج کی سہولت کیلئے کیمپ آفس قائم کر دیا جس میں شعبہ معلومات و رہنمائی، شکایات، امراض و اموات قائم کیے جائیں گے ۔
وفاقی وزیر مذہبی امور چوہدری سالک حسین بھی حج انتظامات کا جائزہ لینے سعودی عرب پہنچ گئے جہاں وہ مکہ مکرمہ میں منعقدہ حج سمپوزیم میں پاکستان کی نمائندگی کریں گے جبکہ وزیر مذہبی امور اور وفاقی سیکرٹری ذوالفقار حیدر حج آپریشن کی براہ راست نگرانی کریں گے
