اسلام آباد 24 جون (اے پی پی): وزیر اعظم کی ہدایت پر وفاقی بجٹ کے حوالے سے آل ایکسپورٹ ایسوسی ایشن آف پاکستان اور دیگر بزنس کمیونیٹی کی طرف سے اٹھائے گئے خدشات کو دور کرنے کے لیے وفاقی وزیر تجارت جام کمال خان کی زیر صدارت ایک اہم اجلاس آج منعقد ہوا جس میں برآمدات پر بجٹ کے ممکنہ اثرات اور کسی بھی طرح کے منفی اثرات کو کم کرنے کے ممکنہ حل پر تفصیلی تبادلہ خیال کیا گیا۔
اس موقع پر بات کرتے ہوئے وفاقی وزیر جام کمال خان نے برآمدی شعبے کو سپورٹ کرنے اور اس بات کو یقینی بنانے کے لیے حکومت کے عزم پر زور دیا کہ بجٹ بین الاقوامی تجارت کو فروغ دینے کے مقصد سے ہم آہنگ ہو۔
ان کا کہنا تھا کہ موجودہ حکومت برآمد کنندگان کو سہولت فراہم کرنے اور پائیدار ترقی کرنے والی پالیسیوں کے نفاذ کے لیے پرعزم ہے اور برآمدات کو بڑھانے میں حائل رکاوٹوں کو دور کرنے کی ہر ممکنہ کوشش کرے گی
جام کمال نے کہا کہ برآمد کنندگان کے تحفظات کو دور کر کے اور تجارت کے لیے سازگار ماحول کو فروغ دے کر معیشت کو مضبوط بنائیں گے، اس حوالے ایک سپشل کمیٹی بھی بنائ گئی ھے جو اپنی تجاویز وزیر خزانہ کو پیش کرے گی۔
اس اجلاس برآمد کنندگان کے خدشات کو دور کرنے اور تجارتی ماحول کو مزید سازگار بنا کر ملکی معیشت کو مضبوط بنانے کے لیے حکومت کے فعال انداز کی عکاسی کرتی ہے۔
