پشاور، 26جون(اے پی پی): صوبائی الیکشن کمشنر خیبرپختونخوا شمشاد خان نے کہا ہے کہ صوبائی اسمبلی کی خالی نشست پی کے 22 باجوڑ پر 11 جولائی کو ہونے والے ضمنی انتخابات میں 12 امیدواروں کے مابین مقابلہ ہوگا،جس کے لئے تیاریاں تکمیل کے مرحلے میں ہیں۔
صوبائی الیکشن کمشنر خیبرپختونخوا شمشاد خان نے ان خیالات کا اظہار آج الیکشن تیاریوں کے حوالہ سے اجلاس سے خطاب کرتے ہوئے کیا۔اجلاس میں صوبائی الیکشن کمشنر کو تیاریوں پر بریفنگ دی گئی، بریفنگ کے دوران بتایاگیا کہ پی کے 22باجوڑ میں سنی اتحاد کونسل سے راحت اللہ، متحدہ قومی موومنٹ سے صدام حسین، جماعت اسلامی پاکستان سے عابد خان، پی پی پی پارلیمینٹیرین سے عبداللہ عوامی نیشنل پارٹی سے محمد نثار سمیت 7 آزاد حیثیت میں امیدوار حصہ لے رہے ہیں۔
بریفنگ کے دوران بتایا گیا کہ ڈی آر اور، ڈی ایم او کی تربیت پہلے ہی مکمل ہوچکی ہے، جبکہ پولنگ سٹاف کی تربیت یکم جولائی سے 7 جولائی تک مکمل کی جائیگی۔ مجموعی طور پر 1 لاکھ 79 ہزار سے زائد وووٹرز اپنا حق رائے دہی استعمال کریں گے۔ مرد ووٹرز کی تعداد 99 ہزار 38 جبکہ خواتین ووٹرز کی تعداد 79 ہزار 972 ہے جنکی سیکورٹی کے لئے خاطرخواہ انتظامات کئے جارہے ہیں۔
بریفنگ کے دوران بتایا گیا کہ صوبائی الیکشن کمشنر خیبرپختونخوا کے دفتر میں کنٹرول روم قائم کرکے شکایات کا ازالہ کیا جائیگا اور انتخابی مہم کی سختی سے مانیٹرنگ بھی جاری ہے۔ اس موقع پر ضابطہ اخلاق کی خلاف ورزی پر چئیرمین سب ڈویژن نواگئی خلیل الرحمان کو ڈسٹرکٹ مانیٹرنگ آفیسر نے طلب کرکے انہیں وارننگ جاری کی گئی۔
صوبائی الیکشن کمشنر نے ہدایت کی کہ پولنگ کے عمل کو پرامن اور شفاف بنانے کے لئے ضلعی انتظامیہ سے کوآرڈینیشن میں رہیں۔
اجلاس میں ڈائریکٹر الیکشنز آصف علی یاسین، ڈائریکٹر آئی ٹی عبدالقادر ، ڈپٹی ڈائریکٹر فلک ناز، ڈپٹی ڈائریکٹر محمد انور زیب، ڈپٹی ڈائریکٹر آصف خان خٹک ، ڈپٹی ڈائریکٹر ظہیر احمد سہیتھو ترجمان صوبائی الیکشن کمشنر سہیل احمد اور دیگر افسران نے شرکت کی۔
