اسلام آباد۔27جون (اے پی پی):تاجک ایئر لائن سومون ایئر کی افتتاحی پرواز دوشنبہ سے اسلام آباد پہنچ گئی ۔ گورنر خیبرپختونخوا فیصل کریم کنڈی اور پاکستان میں تاجکستان کے سفیر نے مسافروں کا استقبال کیا جبکہ سول ایوی ایشن ریسکیو اینڈ فائر فائٹنگ سروس کی طرف سے روایتی انداز میں واٹر کینن سلامی پیش کی۔
پاکستان سول ایوی ایشن اتھارٹی کے ترجمان کی طرف سے جمعرات کو جاری بیان کے مطابق تاجک ایئر کی افتتاحی پرواز ایس ایم آر- 129 گیارہ بجکر 45 منٹ پر اسلام آباد پہنچی جس پر 14 مسافر سوار تھے۔
ترجمان نے کہا کہ سول ایوی ایشن ریسکیو اینڈ فائر فائٹنگ سروس کے فائر ٹینڈرز نے روایتی انداز میں واٹر کینن سلامی پیش کی۔ اس موقع پر کیک کاٹنے کی تقریب کا بھی انعقاد کیا گیا۔
گورنر کے پی کے فیصل کریم کنڈی اور پاکستان میں تاجکستان کے سفیر یوسف شریفزودا نے پرواز کے مسافروں کا استقبال کیا۔
ایئرپورٹ منیجر ڈائریکٹر ایس اے پیز اور دیگر معززین بھی تقریب میں شریک تھے۔ ترجمان نے کہا کہ فلائیٹ ایس ایم آر- 130 باون مسافروں کے ساتھ تقریباً پونے تین بجے اسلام آباد سے دوشنبہ روانہ ہوگئی۔
