اسلام آباد،2جولائی (اے پی پی):وزیراعظم یوتھ پروگرام کے چیئرمین رانامشہود احمد خان نے ملک میں کھیلوں کے فروغ کے عزم کااظہار کرتےہوئے کہاہے کہ تمام کھیلوں میں کھلاڑیوں کی کارکردگی میں بہتری کے لئے تمام وسائل بروئے کار لائیں گے، پاکستان اپناکھویاہوا مقام حاصل کرے گا ۔
ان خیالات کااظہار انہوں نے منگل کو سپورٹس کے عالمی دن کے موقع پر تقریب سے خطاب کرتےہوئے کیا۔ رانا مشہود احمد خان نے کہا کہ بجٹ میں تنخواہ دار طبقہ سمیت تمام طبقات کو ریلیف فراہم کرنے کے لئے کوشاں ہیں، اشیائے خوردونوش کی قیمتوں میں کمی لارہے ہیں۔
انہوں نے کہا کہ سٹاک مارکیٹ تیزی سے ترقی کررہی ہے جس سے حکومتی پالیسیوں پر رماہی کار وں کا اعتماد ظاہر ہوتا ہے۔
چیلنجز کے باوجود درست سمت میں گامزن ہیں۔ انہوں نے کہا کہ ماضی میں ملک میں سپورٹس کو نظر اندازکیاگیا ہم نے کھیلوں کے میدانوں کو آباد کرنا ہے،نوجوان ہمارا قیمتی اثاثہ ہیں، ان کے لئے وزیراعظم یوتھ پروگرام کے دروازے کھلے ہیں ، حکومت کھیلوں کے فروغ کے لئے کام کررہی ہے۔
انہوں نے کہاکہ ہاکی ٹیم میرٹ پر منتخب کی گئی تھی اور وہ ٹیم بہترین کارکردگی دکھارہی ہے۔ پاکستان سیف گیمز کی میزبانی کررہاہے۔ وزیراعظم ٹیلنٹ ہنٹ سکیم کھیلوں کے 23 شعبے شامل ہیں۔ تمام متعلقہ فریقوں سے مل کر باصلاحیت نوجوانوں کو تربیت دیں گے۔
انہوں نے کہاکہ یوتھ گیمز پر توجہ مرکوز کی ہے ۔ اولمپکس کے لئے کھلاڑیوں کو ہر ممکن تعاون فراہم کریں گے۔ اپنی خامیوں کو دور کریں گے۔ نوجوانوں کےلئے اقدامات کر رہے ہیں،سپورٹس جرنلزم دیگر شعبوں کی طرح اہم ہے،سپورٹس کو صنعت بنانے کے لئے ایسی تقریبات منعقدہونی چاہیے، ملک کی ترقی کاواحد راستہ مل کر کام کرنا ہے۔ اور میرٹ کی بنیاد پر لوگوں کو آگے آنے کا موقع دینا ہے۔
انہوں نے کہاکہ پاکستان اپنا کھویا ہوا مقام حاصل کر لے گا۔ پاکستان کے مرد و خواتین کھلاڑی ملک کانام دنیا بھر میں روشن کریں گے۔
