اسلام آباد،04 جولائی(اے پی پی ):وزیرداخلہ محسن نقوی سے پاکستان میں تعینات اطالوی سفیر میریلینا ارملین نے جمعرات کو یہاں ملاقات کی ہے ،ملاقات میں دوطرفہ تعلقات اور باہمی دلچسپی کے امور پر تفصیلی گفتگو کی گئی ۔
اس موقع پر گفتگو کرتے ہوئے وزیر داخلہ کا کہنا تھا کہ اٹلی کا حالیہ دورہ انتہائی کامیاب اور موثر رہا، اطالوی وزیر داخلہ سے ملاقات میں غیر قانونی انسانی اسمگلنگ کے خلاف مل کر کام کرنے پر اتفاق ہوا جبکہ اس ضمن میں اطالوی وزارت داخلہ کا وفد جلد پاکستان کا دورہ کرے گا، وفد پاکستانی حکام سے ملاقات اور بارڈر کا دورہ کرے گا۔
انہوں نے کہا کہ انسداد منشیات اور انسانی سمگلنگ کو روکنے کےلئے دونوں ممالک کو باہمی تعاون کو مزید مضبوط بنانا ہو گا۔انسانی اسمگلنگ پر کوئی سمجھوتہ نہیں ہو گا، اس کے تدارک کیلئے ہر ممکن اقدامات اٹھائے جا رہے ہیں، اگر ہم انسانی اسمگلنگ کو بارڈر پر روکنے میں کامیاب ہوتے ہیں تو یہ دونوں ممالک کے لئے سود مند ثابت ہو گا جبکہ ہنر مند افرادی قوت کی منتقلی سے بھی انسانی اسمگلنگ کی حوصلہ شکنی ہو گی۔
وزیر داخلہ نے آگاہ کیا کہ اٹلی مختلف شعبوں میں پاکستان کے ہنر مند افراد کی خدمات سے فائدہ اٹھا سکتا ہے۔
اس موقع پر وفاقی وزیر داخلہ نے اطالوی سفیر کو اپنے اطالوی ہم منصب کے دورہ پاکستان کا باقاعدہ دعوت نامہ بھی پیش کیا اور مختلف شعبوں میں تعاون پر وزیر داخلہ کا شکریہ ادا کیا۔
ملاقات میں کمانڈنٹ ایف سی معظم جاہ انصاری، آئی جی اسلام آباد علی ناصر رضوی ، وزارت داخلہ اور وزارت خارجہ کے اعلیٰ حکام نے شرکت کی۔
