اسلام آباد،04 جولائی(اے پی پی):وفاقی وزیر نجکاری و سرمایہ کاری بورڈ اور مواصلات عبدالعلیم خان کی زیر صدارت نجکاری کمیشن کااعلیٰ سطحی اجلاس جمعرات کو منعقد ہوا جس میں وفاقی وزیر قانون اعظم نذیر تارڑ اور وفاقی وزیر خزانہ محمد اورنگزیب نے خصوصی شرکت کی ۔
اجلاس کے دوران وفاقی وزراء کو ہاؤس بلڈنگ فنانس کارپوریشن کی نجکاری کے عمل کی پیش رفت اور اس نجکاری کے تکنیکی اور قانونی پہلوؤں پر بھی تفصیلی بریفنگ دی گئی جس کے بعد وفاقی وزراء نے نجکاری کے اب تک کے عمل پر ااطمینان کا اظہار کرتے ہوئے پرائیوٹائزیشن کمیشن کے فیصلوں کی منظوری دی ۔
اجلاس میں اتفاق کیا گیا کہ پرائیوٹائزیشن کرتے ہوئے ادارے کے ملازمین کے تحفظ کو پیش نظر رکھا جائے گا، پرائیوٹائزیشن کمیشن نے بتایا کہ ان کی طرف سے تیزی سے کام جاری ہے ، جلد نجکاری کے اگلے مراحل کا آغاز ہو گا۔اس موقع پر بات کرتے ہوئے وفاقی وزیر نجکاری عبدالعلیم خان نے ہدایت دی کہ ہاؤس بلڈنگ فنانس کارپوریشن کی طرح دیگر اداروں کی نجکاری بھی یقینی بنائیں، نجکاری کا عمل صاف اور شفاف، غیر ضروری تاخیر نہیں ہونی چاہیے، نجکاری کی ہر پیشکش سب کے سامنے اور کیمروں کی موجودگی میں کھولی جائے ۔
وفاقی وزراء اور نجکاری کمیشن نے ہاؤس بلڈنگ فنانس کارپوریشن میں دلچسپی رکھنے والے گروپ سے مذاکراتی سیشن بھی کیا ۔
