لاہور،04 جولائی (اے پی پی): وزیر اعلیٰ پنجاب مریم نواز نے کہا ہے کہ پنجاب میں کوئی گینگ اور نو گو ایریا برداشت نہیں کیا جائے گا۔
ان خیالات کا اظہار انہوں نے پولیس افسران سے گفتگو کے دوران کیا جنہوں نے ان سے ملاقات کی۔ ملاقات میں وزیراعلیٰ نے پولیس افسران کی کارکردگی جانچنے کیلئے “کی پرفارمنس انڈیکیٹرز” مقرر کردیئے۔ عوامی شکایات، ایف آئی آرز، فرد جرم، نو گو ایریا، سرچ آپریشن اور غیر معمولی کارکردگی دکھانے پر پولیس اہلکاروں اور افسروں کو نمبر ملیں گے۔ اختراعی اور منفرد اقدامات سے پولیس افسروں کو اضافی نمبر ملیں گے جبکہ ٹاسک پورا نہ ہونے پر پولیس افسروں کے نمبر کاٹ لیے جائیں گے۔ وزیراعلیٰ پنجاب مریم نواز کا کہنا ہے کہ پنجاب اسمبلی کے ارکان (ایم پی ایز) میرے لیے پاور ہاؤس کا درجہ رکھتے ہیں مگر میں نے میرٹ کے اصولوں پر عمل کرنے کے لیے سب کو ناراض کیا۔ مریم نواز نے کہا کہ چار ماہ میں کسی آر پی او، ڈی پی او اور ایس ایچ او کی سفارش نہیں کی۔ کسی رکن اسمبلی کے کہنے پر پولیس افسر تعینات نہیں کیے۔ ہم پولیس کی تمام ضرورتیں پوری کر رہے ہیں۔ انہیں جو بھی جدید ترین آلات درکار ہیں دیئے جارہے ہیں۔ اب کام بھی ہونا چاہیے۔ وزیراعلیٰ نے پولیس کے اعلیٰ افسران کو ایس ایچ اوز اور دیگر افسران کی کڑی نگرانی اور بین الصوبائی چیک پوسٹوں پر اچھی ساکھ والے پولیس اہلکاروں کی تعیناتی کا حکم دیا۔ مریم نواز کا کہنا تھا کہ ہم سب عوام کے حقوق کیلئے اللہ تعالی کو جوابدہ ہیں۔ پولیس افسران عوام پر نہیں بلکہ مجرموں پر سختی برتیں۔ جب جرائم بڑھتے ہیں اور لوگوں کو نشانہ بنایا جاتا ہے تو وہ اچھی سڑکیں، مفت دوائیں اور دوسری بہت سی چیزیں بھول کر حکومت کو موردِ الزام ٹھہراتے ہیں۔ مریم نواز نے کہا کہ ایڈمنسٹریشن کیلئے مانیٹرنگ سسٹم متعارف کرانے سے کارکردگی میں بہتری نظر آرہی ہے۔ بچے، خواتین اور کمزور طبقات میری ریڈ لائن ہیں۔ بچوں کے معاملات میں سخت ایف آئی آر درج کی جائیں اور بہترین تفتیش کی جائے۔ وزیر اعلیٰ پنجاب نے کہا ہے کہ پنجاب میں کوئی گینگ اور نو گو ایریا برداشت نہیں، مجرم کو پتہ ہونا چاہیے کہ پکڑے گئے تو سزا سے نہیں بچ پائیں گے۔ مریم نواز کا پولیس افسران سے ملاقات کے دوران مزید کہنا تھا کہ سیاسی مداخلت سے خرابیاں جنم لیتی ہیں، بہت پریشر لیا لیکن سیاسی مداخلت پر فل سٹاپ لگا دیا۔
