لاہور،04 جولائی(اے پی پی):صوبائی وزیر صحت و چیئرمین کابینہ کمیٹی برائے ڈیزاسٹر مینجمنٹ خواجہ سلمان رفیق نے کہا ہے کہ پنجاب میں طوفانی بارشوں اور ممکنہ سیلاب سے نمٹنے کیلئے تیاریاں مکمل ہیں، بارشوں اور ممکنہ سیلابی خطرے کے پیش نظر عوام کیلئے آگاہی مہم چلائی جارہی ہے، انسانی جانوں کے تحفظ کے لئے بروقت اقدامات یقینی بنانے کی کوشش کر رہے ہیں۔
ان خیالات کا اظہار انہوں نے مون سون بارشوں اور دریاؤں کی صورتحال کا جائزہ لینے کیلئے پی ڈی ایم اے ہیڈ آفس کا دورہِ کرنے کے دوران کیا۔ ڈی جی عرفان علی کاٹھیا نے صوبائی وزیر کو مون سون بارشوں اور دریاؤں میں پانی کی صورتحال بارے تفصیلی بریفننگ دی ۔ صوبائی وزیر صحت خواجہ سلمان رفیق نے صوبہ بھر میں بارشوں کی صورتحال کے حوالے سے حفاظتی انتظامات کا بھی جائزہ لیا۔ خواجہ سلمان رفیق نے کہا کہ انسانی جانوں کے تحفظ کے لئے بروقت اقدامات یقینی بنانے کی کوشش کر رہے ہیں۔ انہوں نے ہدایات دیتے ہوئے کہا کہ تمام محکمہ جات، ڈویژنل اور ضلعی انتظامیہ آپس میں قریبی رابطہ رکھیں۔ پی ڈی ایم اے کی دیگر اداروں کے ساتھ کوآرڈینیشن آفات سے بچاؤ میں انتہائی کارآمد ثابت ہو گی۔ ڈی جی پی ڈی ایم اے نے کہا کہ ممکنہ سیلابی خطرے کیلئے تمام تر وسائل بروئے کار لائے جائیں گے۔ ولنرایبل اضلاع میں پیشگی انتظامات مکمل کر لئے گئے ہیں ۔ موسمیاتی تبدیلیوں کے باعث پاکستان کو شدید بارشوں اور سیلابی صورتحال کا سامنا ہو سکتا ہے۔ عرفان علی نے کہا کہ صوبے بھر کے ندی نالوں کی ڈی سلٹنگ دوبارہ کی جا رہی ہے۔
