اسلام آباد،05 جولائی(اے پی پی):وفاقی وزیر داخلہ محسن نقوی کی زیر صدارت سی ڈی اے میں اہم اجلاس منعقد ہوا، اجلاس میں جاری ترقیاتی منصوبوں پر پیش رفت کا تفصیلی جائزہ لیا گیا اور اسلام آباد کو عالمی معیار کا شہر بنانے کے لئے اہم فیصلے کیے گئے۔
وفاقی وزیر داخلہ محسن نقوی نے کہا کہ ماحولیاتی آلودگی میں کمی کے لئے سی ڈی اے آئندہ سے صرف الیکٹرک بائیکس خریدے گی،اسلام آباد کے شہریوں کے لئے ماحول دوست الیکٹرک بسیں چلائی جائیں گی۔وزیرداخلہ نے پٹرول موٹر سائیکلز خریدنے پر بھی پابندی عائد کردی۔
وفاقی وزیر نے کہا کہ اسلام آباد کے شہریوں کو انٹرنیشنل سٹینڈرڈ کی ایمرجنسی سروسز فراہم کی جائیں گی جبکہ اجلاس میں ایمرجنسی سروسز کو ایم سی آئی سے سی ڈی اے کو منتقل کرنے کا بھی فیصلہ کیا گیا۔اجلاس میں فیصلہ کیا گیا کہ کیپٹل واسا کا قیام بھی جلد عمل میں لایا جائے گا،کیپیٹل ویسٹ مینجمنٹ کمپنی کے قیام کے لئے متعلقہ امور کو جلد حتمی شکل دی جائے گی۔
وفاقی وزیر داخلہ محسن نقوی نے کہا کہ سرینہ چوک انڈر پاس اور ایف نائن پارک چوک فلائی اوور منصوبوں پر تعمیراتی کام جلد شروع کر دیا جائے گا جبکہ طویل مدت سے زیر التوا ایکسپریس وے کے منصوبے کو مکمل کرنے کے لیے کام کی رفتار تیز کی جائے گی۔ انہوں نے کہا کہ اسلام آباد کے کئی برس سے نان ڈویلپ سکیٹرز میں ترقیاتی کاموں کو مکمل کرکے لوگوں کو قبضہ دیا جائے گا۔
محسن نقوی نے کہا کہ 17 برس سےتعطل کا شکار اسلام آباد ماڈل جیل پر کام تیزی سے جاری ہے، پہلے مرحلہ کو مقررہ مدت میں مکمل کیا جائے گا۔انہوں نے کہا کہ اسلام آباد میں بزنس فیسلیٹشن سنٹر بنائے جا رہے ہیں جہاں سرمایہ کاروں کو سہولیات ایک چھت تلے فراہم کی جائیں گی،سیکٹر ایچ سولہ میں ہیلتھ ٹاور کیلئے زمین کی الاٹمنٹ کر دی گئی ہے۔
وزیر داخلہ نے ریکارڈ ٹیکس وصولی پر چیئرمین سی ڈی اے سمیت پوری ٹیم کو مبارکباد دی۔انہوں نے کہا کہ صرف پلاٹ اور زمین بیچ کر کوئی ادارہ نہیں چل سکتا،ضروری ہے کہ ادارے کے اثاثے بڑھائے جائیں،اس سلسلے میں انوسمنٹ پلان مرتب کرکے 7 روز میں پیش کیا جائے۔
اجلاس میں کری انکلیو،فیڈرل سیکرٹریٹ کی عمارت کی تزئین و آرائش،ڈپلومیٹک انکلیو اور سمارٹ پارکنگ کے منصوبوں پرپیش رفت پر بھی غور کیا گیا۔
اجلاس میں چیئرمین سی ڈی اے محمد علی رندھاوا نے وفاقی وزیر داخلہ کو مختلف منصوبوں پر تفصیلی بریفننگ دی۔اجلاس میں ڈپٹی کمشنر اسلام آباد عرفان میمن اور سی ڈی اے کے تمام ممبران نے شرکت کی۔
