اسلام آباد، 08جولائی(اے پی پی):وفاقی وزیرداخلہ محسن نقوی کی زیر صدارت اوور بلنگ کے ایشو پر وزارت داخلہ میں اجلاس منعقد ہوا۔ اجلاس میں اوور بلنگ کے ایشو کا جائزہ لیا گیا۔ایف آئی اے حکام نے اوور بلنگ پر بریفنگ دی۔
وفاقی وزیرداخلہ محسن نقوی کی جانب سے پروٹیکٹیڈ صارفین کو نان پروٹیکٹیڈ کیٹگری میں شامل کرنے پر شدید تشویش کا اظہار،وفاقی وزیرداخلہ نے پروٹیکٹیڈ صارفین کو ریلیف دینے کیلئے تمام ڈسکوز کا ڈیٹا طلب کرلیا۔انہوں نے کہا کہ ایف آئی اے کے تمام ڈائریکٹرز ڈسکوز کے ڈیٹا کو چیک کرکے رپورٹ پیش کریں۔ وزیرداخلہ نے 3 روز میں ایف آئی اے ڈائریکٹرز کو تمام شواہد جمع کرنے کا ٹاسک دے دیا۔
وفاقی وزیرداخلہ محسن نقوی نے پاکستان بھر میں ڈائریکٹرز ایف آئی اے کو پروریٹا سسٹم کا ریکارڈ جمع کرنے کا حکم دیا۔انہوں نے کہا کہ تمام شواہد کی جامع رپورٹ وزیراعظم کو پیش کی جائے گی۔
وزیرداخلہ محسن نقوی نے ایڈیشنل ڈی جی ایف آئی اے نارتھ کو پشاور،لاہور،گوجرانوالہ اور فیصل آباد خود جاکر صورتحال کا جائزہ لینے اور ڈیٹا جمع کرنے کی ہدایت کی۔انہوں نے کہا کہ پروٹیکٹیڈ صارفین سے زیادتی کا ازالہ کرنا ضروری ہے، ایک ایک شواہد کا جائزہ لے کر ذمہ داران کا تعین کیا جائے۔
اجلاس میں وفاقی سیکرٹری داخلہ، ایڈیشنل ڈی جی ایف آئی اے ہیڈکوارٹر ،ایڈیشنل سیکرٹری داخلہ۔ ایڈیشنل ڈی جی ایف آئی نارتھ اور متعلقہ حکام نے شرکت کی۔ ایف آئی اے کے تمام ڈائریکٹرز ویڈیو لنک کے ذریعے اجلاس میں شریک ہوئے۔
