کوئٹہ، 8 جولائی (اے پی پی): وزیراعظم محمد شہباز شریف سے مسلم لیگ ن کے ارکان پارلیمان کے وفد نے پیر کو یہاں گورنر ہاؤس میں ملاقات کی۔ وفد سے بات چیت کرتے ہوئے وزیر اعظم نے کہا کہ بلوچستان سے منتخب نمائندے صوبے کی ترقی کیلئے اپنا کردار ادا کرتے ہوئے گورنر و وزیر اعلیٰ بلوچستان سے مشاورت سے حلقوں میں ترقیاتی منصوبوں کی تکمیل اور درپیش مسائل حل کرنے کیلئے اقدامات کریں۔
وزیرِ اعظم نے مزید کہا کہ مسلم لیگ ن عوامی خدمت پر یقین رکھتی ہے، پارٹی کے منتخب نمائندے عوامی فلاح و بہبود پر توجہ مرکوز کریں اور بلوچستان میں صوبائی اتحادی حکومت مشاورت سے مسائل کی نشاندہی اور ان کے حل کیلئے جامع منصوبہ بندی کریں۔
ملاقات میں بلوچستان سے تعلق رکھنے والے مسلم لیگ ن کے ارکان پارلیمان کے ساتھ ساتھ وفاقی وزراء جام کمال خان، اعظم نذیر تارڑ، گورنر بلوچستان جعفر خان مندوخیل اور پارٹی عہدیداران نے شرکت کی۔
