کوئٹہ،8جولائی (اے پی پی):وزیراعظم محمد شہبازشریف نے بلوچستان کے تمام زرعی ٹیوب ویلز کو شمسی توانائی پر منتقل کرنے کے تاریخی اقدام کا اجرا ء کرتے ہوئے کہا ہے کہ وفاقی حکومت بلوچستان حکومت کے ساتھ مل کر بلوچستان کے تقریباً 28 ہزار بجلی پر چلنے والے ٹیوب ویلز کو سولر پر منتقل کرے گی،55 ارب روپے کے اس منصوبے کا 70 فیصد وفاقی جبکہ 30 فیصد بلوچستان حکومت ادا کرے گی۔
وفاقی حکومت اور بلوچستان حکومت کے مابین زرعی ٹیوب ویلز کی سولرائزیشن معاہدے پر دستخط کی تقریب پیر کوکوئٹہ میں منعقد ہوئی جس میں وزیرِ اعظم شہباز شریف نے شرکت کی۔ اس موقع پر وزیراعظم نے پیر کو یہاں بلوچستان کابینہ کے ارکان سےملاقات کی جس میں وفاقی وزرا ، گورنر و وزیر اعلی بلوچستان اور متعلقہ اعلیٰ حکام موجود تھے۔
وزیر اعظم نے گفتگو کرتے ہوئے کہاکہ وفاقی حکومت بلوچستان حکومت کے ساتھ مل کر بلوچستان کے تقریباً 28 ہزار بجلی پر چلنے والے ٹیوب ویلز کو سولر پر منتقل کرے گی۔ 55 ارب روپے کے اس منصوبے کا 70 فیصد وفاقی جبکہ 30 فیصد بلوچستان حکومت ادا کرے گی۔وزیرِ اعظم نے وزیرِ اعلی بلوچستان کو زرعی ٹیوب ویلز کی سولرائیزیشن کے منصوبے کو تین ماہ میں مکمل کرنے کا ٹاسک دیا۔
وزیراعظم نے کہا کہ زرعی ٹیوب ویلز کو سولر پر منتقل کرنے سے کسان خوشحال ہوگا اور قابل کاشت رقبے میں اضافہ ہوگا۔ زرعی ٹیوب ویلز کو سولر پر منتقل کرنے سے کسانوں کو پورا دن پانی کی بلاتعطل فراہمی یقینی بنائی جا سکے گی۔ وفاقی حکومت ہر سال بجلی کے بِلوں کی عدم ادائیگی کی وجہ سے سبسڈی کی مد میں 70سے 80 ارب روپے مہیا کرتی رہی مگر پھر بھی کسانوں کو صرف 2 سے 6 گھنٹے بجلی میسر ہوتی تھی۔ وزیراعظم نے کہاکہ زرعی ٹیوب ویلز کی سولرآئیزیشن سے یہ دیرینہ مسئلہ ہمیشہ کیلئے ختم کر رہے ہیں۔دنیا بھر میں شمسی توانائی سے کم لاگت ماحول دوست بجلی بنائی جا رہی ہے۔ ملک بھر میں شمسی توانائی سے بجلی کی فراہمی کے لئے ترجیحی بنیادوں پر اقدامات کر رہے ہیں۔وفاق بلوچستان کی ترقی و خوشحالی کے لئے صوبائی حکومت کے ساتھ مل کر کام کرےگا۔
وزیراعظم نے کہاکہ چین میں سرکاری وظائف پر زرعی شعبے کی پیشہ ورانہ تربیت کیلئے بھیجے جانے والے طلبا میں بلوچستان کے 10 فیصد زائد طلبا کا کوٹہ رکھا گیا ہے۔ چین میں ہواوے کمپنی کے تحت تین لاکھ پاکستانی نوجوانوں کی انفارمیشن ٹیکنالوجی کے شعبے میں تربیت میں بھی بلوچستان کے طلبا کیلئے 10 فیصد اضافی کوٹہ رکھا گیا ہے۔ بلوچستان کے نوجوان اعلی تعلیم یافتہ ہوں گے تو وہ صوبے اور ملک کی ترقی میں اپنا اہم کردار ادا کریں گے۔ بلوچستان کے مسائل کا حل مل بیٹھ کر کریں گے۔ صوبائی حکومت کو تمام مسائل حل کرنے کا یقین دلاتا ہوں۔ بلوچستان کی محرومیوں کو دور کرکے اس کی ترقی میں اپنا کردار ادا کرنا ہم سب کی ذمہ داری ہے۔ وفاقی حکومت نے بلوچستان میں دانش سکولوں کے قیام کے لیے حالیہ بجٹ میں فنڈز مختص کر دیئے ہیں۔
وزیرِ اعظم نے کہا کہ ہماری کوشش ہے کہ دانش سکولوں کو صوبے میں ڈویژنل سطح تک وسعت دی جائے تاکہ اس سے پورے صوبے کے طلبامستفید ہوں۔ امید ہے کہ گورنر بلوچستان شیخ جعفر خان مندوخیل اور وزیر اعلیٰ بلوچستان میر سرفراز بگٹی کی سربراہی میں پوری صوبائی کابینہ صوبے کی ترقی اور خوشحالی میں مزید کردار ادا کرے گی۔
بلوچستان کی کابینہ نے وزیر اعظم محمد شہباز شریف کو صوبے کے مسائل سے آگاہ کیا جس پر وزیراعظم محمد شہباز شریف نے یقین دلایا کہ وفاقی حکومت بلوچستان کی ترقی خوشحالی اور یہاں کے مسائل حل کرنے کیلئے ہر ممکن اقدام اٹھائے گی۔
