سیالکوٹ، 08 جولائی (اے پی پی):رکن قومی اسمبلی چوہدری ارمغان سبحانی کی زیر صدارت ڈسٹرکٹ کوآرڈی نیشن کمیٹی کا اجلاس منعقد ہوا۔ اجلاس میں محکمہ انہار مرالہ ڈویژن کے افسران نے مون سون میں ممکنہ سیلاب کی صورت میں شہریوں کے جان و مال کو محفوظ رکھنے کیلئے اقدامات بارے بریفنگ دی۔
اجلاس میں بتایا گیا کہ بھارت کے غیر قانونی طور پر زیرِ تسلط جموں و کشمیر کے علاقوں میں بارشوں کی صورت میں دریائے چناب، دریائے جموں توی اور دریائے مناور توی سے پانی سب سے پہلے ضلع سیالکوٹ کی حدود میں واقع ہیڈ مرالہ پہنچتا ہے، مرالہ ہیڈ ورکس سے گیارہ لاکھ کیوسک پانی کے اخراج کی گنجائش ہے، ایریگیشن ڈیپارٹمنٹ نے پانچ مانیٹرنگ کیمپس قائم کر دئے ہیں پانی کی آمد و اخراج کی مسلسل نگرانی کی جا رہی ہےنیز دریا کےساتھ تمام حفاظتی پشتے قابل اطمینان حالت میں ہیں۔
اجلاس میں بتایا گیا کہ 2023میں محکمہ انہار نے ماڈل سٹڈی کے بعد شہباز پور کے قریب نئے سٹرکچر بنانے کا منصوبہ منظوری کیلئے حکومت پنجاب کو بھجوا دیا ہے۔ اجلاس میں بتایا گیا کہ حکومت پنجاب ہر رکن اسمبلی کے علاقہ میں ترقیاتی منصوبوں کیلئے 295 ملین روپے کے فنڈز فراہم کرے گی، ارکان اسمبلی ترجیحی لسٹ فراہم کریں گے۔
ڈسٹرکٹ کوآرڈی نیشن کمیٹی نے متفقہ طور پر رکن قومی اسمبلی سید ہ نوشین افتخار کی جانب سے پنجاب یونیورسٹی کیمپس کے جلد قیام کے لئے اقدامات کی تجویز کی حمایت کی، رکن قومی اسمبلی چوہدری ارمغان سبحانی نے ڈالووالی میں گرلز کالج کے قیام کی تجویز دی۔ قبل ازیں ڈپٹی ڈائریکٹر ڈویلپمنٹ محمد آصف نے بریفنگ دی۔
اجلاس میں ڈپٹی کمشنر محمد ذوالقرنین، اراکین قومی اسمبلی سیدہ نوشین افتخار، علی زاہد، اراکین صوبائی اسمبلی محمد منشاءاللہ بٹ، چوہدری طارق سبحانی، فیصل اکرام چوہدری، چوہدری خرم ورک، رانا فیاض احمد، میڈم شکیلہ جاوید آرتھر، اے ڈی سی ریونیو محمد اقبال، اے ڈی سی فنانس مظفر مختار، ضلعی افسران نے بھی شرکت کی۔
