اسلام آباد،08جولائی(اے پی پی):وفاقی وزیرداخلہ محسن نقوی کی زیر صدارت ملک بھر میں محرم الحرام کے دوران امن وامان کے قیام سے متعلق اہم اجلاس پیر کو یہاں وزارت داخلہ میں منعقد ہوا۔ اجلاس میں تمام صوبوں، آزاد کشمیر، گلگت بلتستان اور اسلام آباد میں محرم الحرام کے سکیورٹی پلان کا تفصیلی جائزہ لیا گیا۔
اجلاس میں یکم محرم سے دس محرم الحرام کے جلوسوں اور مجالس میں ڈرون کے استعمال پر پورے ملک میں پابندی کا فیصلہ کیا گیا جبکہ انٹرنیٹ یا موبائل فون کی بندش کا فیصلہ سکیورٹی خدشات کے تناظر میں متعلقہ صوبوں کی مشاورت سے کیا جائے گا۔
وفاقی وزیر داخلہ نے کہا کہ انٹرنیٹ یا موبائل فون کی بندش سے شہریوں کو مشکلات کا سامنا کرنا پڑتا ہے، اس ضمن میں زمینی حقائق اور سکیورٹی صورتحال کے مطابق فیصلہ کرنے کی ضرورت ہے۔انہوں نے کہا کہ محرم الحرام کے دوران صوبوں، آزاد کشمیر،گلگت بلتستان اور اسلام آباد میں قیام امن کیلئے ہر ممکن تعاون فراہم کیا جائے گا اور سیکورٹی سے متعلق ضروریات کو پورا کیا جائے گا۔
وزیر داخلہ محسن نقوی نے بارشوں کے پیش نظرجلوسوں اور مجالس کے لئے پیشگی پلان تیارکرنے کا کرنے کی ہدایت کی۔انہوں نے داخلی اور خارجی راستوں پرسخت چیکنگ کا حکم دیا اور کہا کہ جلوسوں و مجالس کی کیمروں کے ذریعے نگرانی کی جائے، ضابطہ اخلاق کی پابندی کرائی جائےاور مساجد، امام بارگاہوں اور دیگر عبادت گاہوں کی سکیورٹی پر بھرپور توجہ دی جائے ۔
اجلاس میں پنجاب، خیبرپختونخوا، سندھ، بلوچستان، آزاد کشمیر، گلگت بلتستان اور اسلام آباد کے آئی جیز پولیس اور سیکرٹریز داخلہ نے محرم الحرام کے دوران امن عامہ کے پلان پر بریفنگ دی۔
اجلاس میں وفاقی سیکرٹری داخلہ، وفاقی سیکرٹری مذہبی امور، چیئرمین سی ڈی اے،آئی جی اسلام آباد پولیس، وزارت داخلہ اور قانون نافذ کرنے والے اداروں کے اعلی حکام نے شرکت کی جبکہ تمام صوبوں، آزاد کشمیر، گلگت بلتستان کے چیف سیکرٹریز، آئی جیز پولیس، سیکرٹریز داخلہ، فرنٹیئر کانسٹیبلری کے کمانڈنٹ، فرنٹیئر کور بلوچستان نارتھ، ساوتھ اور قانون نافذ کرنے والے اداروں کے اعلی حکام نے وڈیو لنک کے ذریعے اجلاس میں شرکت کی۔
