سکھر،16 جولائی (اے پی پی ): وزیر اعلیٰ سندھ سید مراد علی شاہ کی مولا کربلا روہڑی کے 500 سالہ تاریخی ماتم پر آمد ،ماتمی جلوس کے منتظمین سے ملاقات کی اور تفصیلات لیں، روہڑی میں محرم الحرام میں 1446 ھ کے تاریخی ماتم کے حوالے سے ڈپٹی کمشنر ایم بی دھاریجو نے بریفنگ دی۔
ڈپٹی کمشنر ایم بی دھاریجو نے بریفنگ دیتے ہوئے بتایا کہ روہڑی میں 7 تا 10 محرم الحرام کے ماتمی جلوسوں میں بڑی تعداد میں عزادار شرکت کرتے ہیں، محرم الحرام کا ماتمی جلوس دن ایک بجے سے برآمد ہوتا ہے اور حیدر شاہ حقانی امام بارگاہ پر شام 5 بجے اختتام پزیر ہوگا، 10 محرم کو ماتمی جلوس حیدر شاہ حقانی امام بارگاہ سے دوپہر 2 بجے برآمد ہوتا ہے اور شام 4 بجے اسٹیشن روڈ روہڑی پر اختتام پزیر ہوگا، ماتمی جلوسوں کی 24 گھنٹے نگرانی کے لئے 3 کنٹرول رومز قائم کئے ہیں، 1275 پولیس اہلکار، 121 رینجرز اور 49 آرمی کے جوان سکیورٹی کے فرائض سرانجام دے رہے ہیں۔
روہڑی کے تعلقہ اسپتال میں ایمرجنسی نافذ کر دی گئی، محکمہ صحت سندھ نے 7 طبی رلیف کیمپ، پی پی ایچ آئی کے 3 کیمپ، ریسکیو 1122 نے ایک طبی کیمپ روہڑی میں لگایا ہے، 4 ایمبولینسز اور 3 فائربرگیڈ کو ایمرجنسی کی صورت میں الرٹ رکھا ہوا ہے، سی ایم او کی طرف سے کربلا میدان میں شکایات اور فوری مدد کے لیے ایک کیمپ قائم کیا گیا ہے۔
عزاداروں کو سہولت فراہم کرتے ہوئے امام بارگاہوں اور راستوں میں 10 جنریٹرز، 50 پنکھے لگائے ہیں، پورے شہر میں 5 کلومیٹر کے علاقے کو مکمل روشن کیا گیا ہے،2 واٹر بوزر اور 85 مین ہول، سڑک کے پیچ بھرے گئے،تمام جلوس کے راستے سے لٹکتی تار ہٹا دی گئی،ماتمی جلوسوں کی سکیورٹی کو یقینی بنانے کیلئے سسیپکو کو لوڈشیڈنگ نہ کرنے کی ہدایت دی ہے، صفائی ستھرائی کیلئے میونسپل کے 54 اور 18 سالڈ ویسٹ مینجمنٹ کا عملہ ڈیوٹی سرانجام دے رہا ہے۔
جلوس کے دوران بروقت صفائی کو یقینی بنانے کے لیے 6 ٹیمیں روٹ پر تعینات کی گئیں، ریونیو حکام،سی ایم او، سالڈ ویسٹ، سوئی گیس، سیپکو، پی ٹی سی ایل، ریسکیو 1122، پی پی ایچ آئی،محکمہ صحت کا عملہ 24 گھنٹے خدمات فراہم کر رہا ہے۔
