اسلام آباد،18 جولائی (اے پی پی):نئی نسل کو منشیات سے بچانے کا عزم، وفاقی وزیرداخلہ نےملک میں11 برس بعد نیشنل ڈرگ سروے کرنے کی اصولی منظوری دے دی۔نیشنل ڈرگ سروے کے تحت ملک بھر میں منشیات استعمال کرنے والے افراد کا ڈیٹا اکٹھا کیا جائے گا۔
وفاقی وزیر داخلہ و انسداد منشیات محسن نقوی کی زیر صدارت جمعرات کو یہاں کمیٹی برائے نیشنل ڈرگ سروے کا اجلاس منعقد ہوا، اجلاس سے خطاب میں وفاقی وزیر کا کہنا تھا کہ نیشنل ڈرگ سروے کو ہر صورت جامع اور مستند ہونا چاہیے۔سروے کے درست ڈیٹا کی اصل اہمیت ہے اور اسی کا فائدہ ہو گا۔ سروے میں گھروں کے علاوہ تعلیمی اداروں، کچی آبادیوں اور دیگر جگہوں سے بھی ڈیٹا اکٹھا جمع کرنے کی ہدایت کی گئی۔
اس موقع پر وفاقی وزیر نے کہا کہ مستند اور جامع سروے سے ہی انسداد منشیات کے ضمن میں بھرپور اور مفصل فیصلہ سازی ممکن ہو گی۔انسداد منشیات پر کوئی سمجھوتہ نہ ہوگا کیونکہ یہ قوم کے مستقبل کا مسئلہ ہے۔
اس کے علاوہ پندرہ دن کے اندر سروے سے متعلق معاملات کو حتمی شکل دینے کی ہدایت کی گئی۔
محسن نقوی نے اے این ایف اور پاکستان بیورو آف سٹیٹسٹکس کو مل کر سروے کے انعقاد کے لیے طریقہ کار،مطلوبہ ڈیٹا کی نوعیت، نمونہ کی شکل،اور ٹائم لائن کو وضع کرنے کی ہدایت کرتے ہوئے کہا کہ سروے کے انعقاد میں تعاون کیلئے بین الاقوامی ترقیاتی اداروں سے بھی رابطہ کیا جائے۔
واضح رہے کہ آخری نیشنل ڈرگ سروے 2013 میں ہوا تھا۔
اجلاس میں وفاقی سیکرٹری داخلہ،سیکرٹری پلاننگ،ایڈیشنل سیکرٹری فنانس،سپیشل سیکرٹری ہیلتھ، ڈی جی اے این ایف اور چیف سٹیٹیشن نے شرکت کی۔
