اسلام آباد۔24جولائی (اے پی پی):وفاقی وزیر برائے نجکاری و سرمایہ کاری بورڈ اور مواصلات عبدالعلیم خان سے آج پاکستان میں فرانس کے سفیر نکولس گیلے نے ملاقات کی۔ جس میں باہمی دلچسپی کے مختلف امور اور ملکی معاشی معاملات پر تبادلہ خیال کیا گیا۔
اس موقع پر بات کرتے ہوئے وفاقی وزیر کا کہنا تھا کہ ملکی معیشت کی مضبوطی کے لئے خسارے والے اداروں کی نجکاری کر رہے ہیں، پرائیوٹائز ہونے والے سارے اداروں میں منافع کمانے اور بہتر کام کرنے کی صلاحیت ہے۔
وفاقی وزیر نے کہا کہ سرمایہ کاری اور معاشی لحاظ سے یورپی ممالک انتہائی اہمیت کے حامل ہیں، تجارت کے فروغ کے لئے چین اور وسط ایشیائی ممالک تک روڈ نیٹ ورک مکمل کریں گے جبکہ کراچی سے سکھر موٹر وے اولین ترجیح ہے تا کہ پشاور تک روڈ نیٹ ورک مکمل ہو سکے۔
ملاقات کے دوران سفیر نکولس گیلے نے وفاقی وزیر عبدالعلیم خان سے دو طرفہ تعاون کے اموراور فرانس کی طرف سے پاکستان کے لئے مختلف شعبوں میں دلچسپی کا اظہار کرتے ہوئے مشترکہ کوششوں بارے گفتگوکی۔
انہوں نے کہاکہ جدید ٹیکنالوجی، دفاعی پیداوار اور آئی ٹی میں بھی فرانس کی مہارت سے فائدہ اٹھا سکتے ہیں، پاکستان میں قیام خوشگوار ہے، یہاں کی مہمان نوازی سے لطف اندوز ہو رہا ہوں۔
ملاقات میں پاکستان اور فرانس کے درمیان دو طرفہ تجارت میں اضافے کے لئے مختلف تجاویز پر بھی بات چیت کی گئی۔نکولس گیلے نے پاکستان میں مختلف شعبوں میں سرمایہ کاری اور کاروباری سرگرمیوں میں دلچسپی کا اظہار کیا ۔
وفاقی وزیر نے فرانسیسی کمپنیوں کو مختلف شعبوں میں سرمایہ کاری اور دو طرفہ تجارت کی دعوت دی جبکہ فرانسیسی سفیر نے وفاقی وزیر کو فرانس کے دورے اور بزنس ایسوسی ایشن سے ملاقات کی دعوت دی۔فرانس کے سفیر نے وفاقی وزیر سے نیشنل ڈے کے استقبالیے میں شرکت پر اظہار تشکر کیا۔
