لاہور، 29جولائی ( اے پی پی ): وزیراعلی پنجاب مریم نوازشریف نے صوبے بھر میں سپلائی چین میکنزم کو مزید موثر بنانے کے لئے اقدامات کی ہدایت کی اور کہا ہے کہ عوام پر مہنگائی کا بے جا بوجھ ڈالنے کی اجازت نہیں دیں گے،بنیادی اشیاء ضروریہ کے نرخ عوام کی پہنچ میں ہونے چاہیئے،ڈیمانڈ اینڈ سپلائی کا میکنزم درست کرنے سے مصنوعی مہنگائی پر کنٹرول ممکن ہوگا۔
ان خیالات کا اظہار انہوں نے نرخ او رسپلائی چین میکنزم سے متعلق ہنگامی اجلاس کی صدارت کرتے ہوئے کیا۔ اجلاس میں سپلائی چین میکنزم اور اشیاء خوردو نوش کے نرخ پر تفصیلی بریفنگ دی گئی ۔۔ وزیر اعلی نے کہا کہ اشیاء ضروریہ کی فراہمی کے سسٹم کو بہتر بنانے سے اخراجات میں مزید کمی ہوگی ، بحران اور کمی کی صورتحال سے بچنے کے لئے سپلائی چین میکنزم کو فول پروف بنایا جائے۔
اجلاس میں سینیٹر پرویز رشید، صوبائی وزیر اطلاعات وثقافت عظمی زاہد بخاری، وزیر زراعت عاشق حسین، چیف سیکرٹری،متعلقہ سیکرٹریز اور دیگر حکام موجود تھے۔
