اسلام آباد، 29 جولائی (اے پی پی): : صدر آصف علی زرداری سے چیئرپرسن بے نظیر انکم سپورٹ پروگرام روبینہ خالد نے پیر کے روز ملاقات کی۔اس موقع پر چیئرپرسن بی آئی ایس پی نے بینظیر کفالت ، تعلیمی وظائف ، اسکالرشپس برائے انڈر گریجویٹ اور نشوونما پروگرام پر بریفنگ دی۔
صدر زرداری کو بریفنگ میں بتایا گیا کہ 2022 میں سیلاب کے دوران، بے نظیر انکم اسپورٹ پروگرام نے پاکستان بھر میں سیلاب سے متاثرہ 27 لاکھ خاندانوں میں 70 ارب روپے تقسیم کیے گئے جبکہ رواں مالی سال کے دوران انکم سپورٹ پروگرام کیلئے 598.718 ارب روپے مختص کیے گئے ہیں۔
صدر زرداری نے معاشرے کے مستحق اور پسماندہ طبقے کو مالی ریلیف فراہم کرنے پر بے نظیر انکم اسپورٹ پروگرام کو سراہتے ہوئے پروگرام کے دائرہ کار کو مزید بڑھانے اور زیادہ سے زیادہ مستحق طلباء کو وظائف کی فراہمی کیلئے ڈونرز اور پرائیویٹ سیکٹرز کی شمولیت پر زور دیا اور گوادر میں بھی اسکا دفتر کھولنے کی ہدایت کی۔
صدر مملکت نے بینکوں کی جانب سے بے نظیر کارڈ ہولڈرز سے 0.45 فیصد سروس چارجز کٹوتی کا نوٹس لیتے ہوئےسروس چارجز ختم کرنے کیلئے اسٹیٹ بینک سے رابطہ کرنے کی ہدایت کی اور کہا کہ بینکوں سے اس پروگرام کے مستحقین کے اکاؤنٹ کھولنے کا کہا جائے تاکہ ادائیگی کے جدید نظام سے پروگرام کے مستفید افراد کو استحصال سے بچایا جاسکے۔
