اسلام آباد،30جولائی(اے پی پی):وزیر داخلہ محسن نقوی سے گورنر خیبرپختونخوا فیصل کریم کنڈی نے ملاقات کی جس میں مختلف امور پر تبادلہ خیال کیا گیا۔منگل کووزارت داخلہ آمد پر وفاقی وزیر داخلہ نے ان کا خیرمقدم کیا۔ دونوں رہنمائوں کی ملاقات میں باہمی دلچسپی کے امور اور امن عامہ کی صورتحال پر تبادلہ خیال کیا گیا۔
وزیرداخلہ محسن نقوی نے کہا کہ خیبر پختونخوا میں امن و امان کے لئے ہر ممکن تعاون جاری رکھیں گے۔ انہوں نے کہا کہ خیبر پختونخوا میں فرنٹیئر کانسٹیبلری، سی ٹی ڈی اور پولیس کو جدید ٹیکنالوجی اور اسلحہ سے لیس کیا جارہا ہے، دہشت گردی کے خلاف جنگ میں خیبرپختونخوا فرنٹ لائن پر ہے۔ خیبرپختونخوا پولیس، ایف سی اور سی ٹی ڈی کے بہادر سپوتوں نے اس جنگ میں شجاعت کی تاریخ اپنے لہو سے لکھی ہے، دہشت گردی کے خلاف جنگ میں صرف جیت کا ہی آپشن ہے۔
وفاقی وزیر داخلہ نے اس عزم کا اعادہ کیا کہ دہشت گردی کے ناسور کا خاتمہ انشاء اللہ قوم کے اتحاد اور اتفاق سے کریں گے ۔
