اسلام آباد، 31 جولائی (اے پی پی ):وفاقی وزیر برائے منصوبہ بندی ترقی و اصلاحات وخصوصی اقدامات احسن اقبال نے کہا ہے کہ دنیا میں ہر کامیاب ملک نے امن،استحکام،پالیسیوں کے تسلسل اور مسلسل اصلاحات کے ذریعے ترقی حاصل کی ہے۔
ان خیالات کا اظہار انہوں نے بدھ کو انسٹی ٹیوٹ آف ریجنل سٹڈیز کے سیمینار “سی پیک – امکانات اور چیلنجز” میں خطاب کرتے ہوئے کیا۔ وفاقی وزیر احسن اقبال نے کہاکہ تاریخ گواہ ہے کہ 7 دہائیوں پر محیط پاک چین دوستی مضبوط ہوتی چلی جارہی ہے،ہماری دوستی سمندر سے گہری، شہد سے میٹھی، اور اس سال مئی میں کمیونیکیشن سیٹلائٹ کے لانچ کے ساتھ آسمان سے اونچی ہو گئی ہے۔
انہوں نے کہا کہ 2013 میں پاکستان میں 16 سے 28 گھنٹے لوڈ شیڈنگ ہوتی تھی۔ ہم نے 2 جنگوں میں اپنے وسائل کی قربانی دی کولڈ وار اور11/9 میں اور کہا کہ 30 لاکھ سے زائد مہاجرین پاکستان میں داخل ہوئے جو مغرب کی جنگوں کے مہاجر تھے، ہمارا ملک افغانستان میں نیٹو کو مفت شپمنٹ فراہم کرتا رہا لیکن ایک پیسہ بھی نہیں لیا،امریکہ میکسیکو کے مہاجرین کو اپنی سرحدوں میں داخل ہونے کی اجازت نہیں دیتا لیکن پاکستان نے مہاجرین کے لیے دروازے کھولے ۔
وفاقی وزیر نے کہا کہ ہم 2013 میں حکومت میں آئے، سی پیک پر دستخط ہوئے اور اگست 2013 میں جے سی سی کا پہلا اجلاس ہوا،چین پاکستان میں غیر ملکی انویسٹمنٹ کرنے والا سب سے بڑا ملک بن گیا،2015 میں صدر شی جن پنگ نے پاکستان کا دورہ کیا اور 42 بلین ڈالر کی سرمایہ کاری پر دستخط کئے۔انہوں نے کہاکہ وال اسٹریٹ کی ہیڈلائن کے مطابق پاکستان کا تصور دہشت گردوں کی محفوظ پناہ گاہ سے بدل کر اربوں ڈالر کی سرمایہ کاری مدعو کرنے والا ملک بن گیا،2013 سے 2015 کے درمیان 2.3 ملین ملازمتوں کے مواقع پیدا ہوئے،چین سے صنعتی سرمایہ کاری راغب کرنے کے لیے 9 اقتصادی زون قائم کیے گئے۔
وفاقی وزیر احسن اقبال نے کہا کہ 1992 میں ہم نے لبرلائزیشن،ڈی ریگولیشن،نجکاری کی پالیسیاں متعارف کروائیں۔انہوں نے کہا کہ سرتاج عزیز نے مجھے بتایا کہ وزیر خزانہ منموہن سنگھ نے پاکستان میں بزنس ریفارمز کو بھارت میں نافذ کرنے کا ارادہ کیا ۔90 کی دہائی سیاسی خلل کی نذر ہو گئی۔ بھارت نے اصلاحات نافذ کیں اور ہم سے آگے نکل گئے۔پالیسیاں 10 سال سے پہلے ڈیلیور نہیں ہوتیں۔
احسن اقبال نے کہا کہ ترقی کی سیاست پی ٹی آئی دور میں نفرت اور پولرائزیشن کی سیاست میں بدل گئی۔پی ٹی آئی نے ایران سے 100 میگاواٹ پائپ لائن پراجیکٹ 4 سال تک موخر کیا،ہم نے اسے 8 ماہ میں بنا دیا۔گوادر سے پنجکورتک نیشنل گرڈ 12 ماہ میں مکمل ہوا جسے پی ٹی آئی نے روکا ہوا تھا۔
انہوں نے کہا کہ گوادر پورٹ میں 4 سال سے مینٹیننس ڈریجنگ نہیں کی گئی تھی، گوادر کی گہرائی پر منفی اثر پر رہا تھا،2022 میں ہم نے 5 ارب میں مینٹیننس کیا اور گوادر ایک بار پھر گہرے سمندر کی بندرگاہ بن گیا۔
