اسلام آباد، 31 جولائی (اے پی پی ): وزیراعظم محمد شہباز شریف سے ایشیاء انٹرنیٹ کولیشن کے 3 رکنی وفد نے مینیجنگ ڈائریکٹر جیف پئین کی قیادت میں بدھ کو یہاں ملاقات کی، ملاقات میں ڈیٹا کے تحفظ ، انٹر نیٹ پر مواد کے حوالے سے ضابطہءاخلاق اور الیکٹرانک جرائم کی روک تھام کے حوالے سے حکمت عملی پر گفتگو کی گئی۔
وفد نے وزیر اعظم کو انفارمیشن ٹیکنالوجی کے شعبے میں جاری اپنی سروسز کے بارے میں تفصیل سے آگاہ کرتے ہوئے بتایا کہ پرسنل ڈیٹا پروٹیکشن بل کے مسودے پر تمام اسٹیک ہولڈرز کے ساتھ مشاورت جاری ہے۔
وزیر اعظم نے انکی خدمات کو سراہتے ہوئے کہا کہ ملک میں انٹر نیٹ کی تیز تر اور بلا تعطل فراہمی کے لیے حکومت بھرپور اقدامات اٹھا رہی ہے جبکہ حکومت کے ڈیجیٹل پاکستان انیشئٹو کے تحت سارے نظام کو ڈیجیٹائز کیا جا رہا ہے۔
ملاقات میں وزیر مملکت برائے انفارمیشن ٹیکنالوجی و ٹیلی کام شزا فاطمہ ، تانیہ ایدروس اور متعلقہ اعلیٰ سرکاری افسران نے شرکت کی۔
