اسلام آباد،01 اگست( اے پی پی ):صدر آصف علی زرداری سے ڈاکٹر گوہر اعجاز کی قیادت میں فیڈریشن آف پاکستان چیمبرز آف کامرس اینڈ انڈسٹری کے وفد نے ملاقات کی، جس میں تاجروں اور 40 علاقائی کاروباری تنظیموں کے عہدیدار شامل تھے۔
وفد کی قیادت کرتے ہوئے گوہر اعجاز نے صدر مملکت کو آگاہ کیا کہ توانائی کی بڑھتی قیمتوں سے عوام، صنعتوں ، زراعت اور برآمدات کے شعبے پر بوجھ پڑ رہا ہے، توانائی کی قیمتوں میں کمی لانے کے لیے توانائی شعبے میں اصلاحات کیلئے صدر مملکت سے درخواست ہے کہ توانائی کی قیمتوں کے معاملے میں مداخلت کریں اور پاکستان کی صنعتوں اور کاروباری اداروں کو درپیش مسائل کے حل میں اپنا کردار ادا کریں۔
صدر زرداری نے وفد کو مسائل کے حل میں تعاون کا یقین دلاتے ہوئے کہا کہ پاکستان کے کاروباری اداروں کو درپیش مسائل سے آگاہ ہوں، کیپسٹی چارجز کے مسئلے کا قابلِ عمل حل تیار کرنے کیلئے کاروباری برادری ایک کمیٹی تشکیل دے، جو ِ توانائی کے مسائل کے حل کیلئے صدر مملکت کے دفتر کے ساتھ مل کر کام کرے۔ صدر مملکت کا دفتر کاروباری برادری کی کمیٹی کے ساتھ ہر ممکن تعاون کرے گا تاکہ سب کیلئےمتفقہ سودمند حل ہو اور کسی اسٹیک ہولڈرز کو نقصان نہ ہو۔
