مظفرآباد،04 اکتوبر (اے پی پی ):وزیراعظم آزادکشمیر چوہدری انوارالحق نے کہا ہے کہ ہندوستان کی حکومت نے مقبوضہ کشمیر میں آرٹیکل 370 اور35Aکو منسوخ کرتے ہوئے اقوام متحدہ کی قراردادوں کی کھلم کھلا خلاف ورزی کی، 5 اگست 2019 کشمیریوں کی تاریخ کا سیاہ ترین دن ہے۔
5 اگست یوم استحصال کشمیر کے موقع پرخصوصی پیغام میں وزیراعظم آزادکشمیر چوہدری انوارالحق نے کہا کہ انتہاء پسند مودی حکومت نے انتہا پسند ہندووں اور سابق فوجیوں کو ڈومیسائل جاری کر کے انہیں مقبوضہ جموں وکشمیر میں بسانے کا سلسلہ شروع کیا، 05اگست 2019 کے اقدام کے بعد مقبوضہ جموں وکشمیر کو دنیا کی سب سے بڑی جیل میں تبدیل کر دیا گیا۔مقبوضہ کشمیر پر بھارت کا قبضہ ایک بڑے انسانی بحران اور المیے میں تبدیل ہو چکا ہے ۔مقبوضہ کشمیر ابھی بھی ایک بڑی جیل ہے جہاں عبادات پر پابندیاں اور شہری آزادیاں سلب ہیں۔
وزیراعظم آزادکشمیر چوہدری انوارالحق نے کہا کہ کشمیریوں پر ظلم و ستم گزشتہ ایک صدی سے جاری ہے لیکن ان کے پائیہ استقلال میں کبھی لغزش نہیں آئی۔ 5 اگست 2019 کے بعد ہندوستانی حکومت نے مقبوضہ جموں و کشمیر میں ظلم کا ایک نیا دور شروع کیا۔ انسانی تاریخ کے بدترین مظالم سہنے کے بعد کشمیری عوام کے حوصلے بلند ہیں۔انہوں نے کہا کہ دفاع وطن کیلئے قربانیوں کی بے مثال تاریخ رقم کرنے پر افواج پاکستان کو سلام پیش کرتا ہوں، افواج پاکستان کشمیریوں کی عزتوں اور عصمتوں کی محافظ ہے ،لائن آف کنٹرول کے دونوں اطراف کے کشمیری اسے اپنی محافظ فوج سمجھتے ہیں۔
وزیراعظم آزادکشمیر چوہدری انوارالحق نے کہا کہہندوستان کی قاتل افواج کشمیریوں کے لیے نفرت کی علامت ہے، اقوام متحدہ سے مطالبہ کرتا ہوں کہ وہ اپنی قراردادوں پر عملدرآمد کروانے کیلئے اپنا عملی کردار ادا کرے۔انہوں نے کہا کہ وہ دن دور نہیں جب لائن آف کنٹرول کے دونون اطراف کے کشمیری الحاق پاکستان کی منزل حاصل کر کے پاکستان کی تکمیل کریں گے۔
