تھرپارکر، 05 اگست (اے پی پی):ضلعی انتظامیہ تھرپارکر کی جانب سے یوم استحصال کشمیر کے موقع ایڈیشنل ڈپٹی کمشنر ون تھرپارکر ریاض احمد شیخ،چیئرمین میونسپل کمیٹی مٹھی ڈاکٹر منوج کمار ملانی کی قیادت میں نیشنل بینک مٹھی سے کشمیر چوک مٹھی تک ریلی نکالی گئی، ریلی میں شرکاء نےکشمیر بنے گا پاکستان، پاکستان زندہ باد کے نعرے لگائے گئے۔اس موقع پر شرکاء نے اپنے ہاتھوں میں بینرز، پاکستان اور کشمیر کے پرچم اٹھا رکھے تھے، کشمیر چوک مٹھی پر رہنماؤں نے ریلی سے خطاب کرتے ہوئے کہا کہ کشمیر پاکستان کی شہہ رگ ہے، ہم پاکستانی عوام کشمیری بھائیوں کے ساتھ ہیں، پاکستان ہمیشہ کشمیری عوام کے ساتھ شانہ بشانہ کھڑا ہے، کشمیری بھائیوں پر بھارتی مظالم پر پوری قوم کشمیریوں کے ساتھ ہے، بھارت آج بھی کشمیری عوام پر ظلم و بربریت ڈھا رہا ہے اور اقوام متحدہ کی کشمیر کے حق خود ارادیت کے متعلق قرارداد پر عمل درآمد کروانا ہے تاکہ کشمیری عوام آزادی کے ساتھ زندگی بسر کر سکیں۔اس موقع پر ضلعی افسران، اساتذہ، طالب علم،شہریوں سمیت عوام کی بڑی تعداد نے ریلی میں شرکت کی۔
