اسلام آباد، 07 اگست (اے پی پی):اسلام آباد کے شہریوں کو عالمی معیار کی تفریحی سہولتوں کی فراہمی کا شاندار پلان،پاکستان کا سب سے زیادہ خوبصورت اور انٹرنیشنل سٹینڈرڈ کا پہلا چڑیا گھر و سفاری پارک اسلام آباد میں بنے گا۔
وفاقی وزیرداخلہ محسن نقوی نے چڑیا گھر و سفاری پارک پراجیکٹ کی اصولی منظوری دے دی ہے،چڑیا گھر و سفاری پارک 200 ایکٹر اراضی پر مشتمل ہو گا،جس میں مجموعی طور پر5 ہزار جانور، پرندے رکھے جائیں گے،پہلے مرحلے میں 2 ہزار جانور اور پرندے رکھے جائیں گے۔
وفاقی وزیر داخلہ محسن نقوی کی زیر صدارت سی ڈی اے ہیڈکوارٹر میں اجلاس ہوا جس دوران چڑیا گھر وسفاری پارک کے قیام کے حوالے سے تجاویز کا جائزہ لیاگیا۔ چیئرمین سی ڈی اے محمد علی رندھاوا نے چڑیا گھر و سفاری پارک کے قیام کے پراجیکٹ کے حوالے سے بریف کیا۔
وزیرداخلہ محسن نقوی نے چڑیا گھر و سفاری پارک کی ورلڈ ایسوسی ایشن آف زو اینڈ ایکوریم سے رجسٹریشن کرانے کی ہدایت کی اور کہا کہ منصوبے سے متعلق امور کو جلد طے کیا جائے، اکتوبر میں چڑیا گھر و سفاری پارک کا سنگ بنیاد رکھا جائے گا۔ انہوں نے کہا کہ چڑیا گھر و سفاری پارک سے اسلام آباد کی سیاحت میں اضافہ ہوگا۔
