اسلام آباد،7اگست(اے پی پی):وفاقی وزیر برائے صنعت و پیداوار رانا تنویر حسین سے پاکستان میں امریکہ کے سفیر ڈونلڈ ارمین بلوم نے آج ملاقات کی جس میں دوطرفہ تعلقات اور باہمی دلچسپی کے امور پر تفصیلی تبادلہ خیال کیا گیا۔
اس موقع پر بات کرتے ہوئے وفاقی وزیر رانا تنویر حسین کا کہنا تھا کہ پاکستان امریکہ کے ساتھ شراکت داری کو قدر کی نگاہ سے دیکھتا ہے،ریسرچ اینڈ انڈومنٹ فنڈ میں زرعی یونیورسٹی کے لیے امریکہ کے تعاون کو سراہتے ہیں اور زرعی تعاون کو مضبوط بنانا چاہتے ہیں۔
رانا تنویر حسین نے کہا کہ پیداوار بڑھانے کے لیے زرعی ٹیکنالوجی کی منتقلی کی ضرورت ہے، نئی پاکستانی زرعی مصنوعات کو امریکی مارکیٹ تک رسائی دی جائے۔
امریکہ کے سفیر ڈونلڈ ارمین بلوم نے کہا کہ پاکستان میں سماجی اور زرعی شعبے میں تعاون جاری رکھیں گے اس کے علاوہ ہم پاکستان میں یونیسیف کے ساتھ مل کر غذائی قلت پروگرام پر کام کر رہے ہیں۔
ڈونلڈ بلوم نے مزید کہا کہ امریکہ زراعت پر موسمیاتی تبدیلی کے اثرات سے نمٹنے کے لیے پاکستان کی مدد کرے گا۔
