اسلام آباد ، 8 اگست ( اے پی پی ): چیئرمین سینیٹ سید یوسف رضا گیلانی نے سمر انٹرنشپ پروگرام کی تکمیل کے موقع پر تقریب سے خطاب کرتے ہوئے کہا کہ قانون سازی کے ایوانوں میں نوجوانوں کی شرکت کا رجحان دنیا بھر میں فروغ پا رہا ہے۔
چیئرمین سینیٹ نے ایوان بالاکی کمیٹیوں اور سیکرٹریٹ میں نمایاں کارکردگی پر سب کو خراج تحسین پیش کیا۔انہوں نے مزید کہا کہ پارلیمانی عمل میں نوجوانوں کی شمولیت نہ صرف اہم اقدام بلکہ ملکی مفاد کےلئے بہت ضروری ہے۔
انہوں نے کہا کہ پاکستان کی 64 فیصد آبادی نوجوانوں پرمشتمل ہے جو ملک کا انتہائی قیمتی اثاثہ ہیں اورنوجوانوں میں سماجی و معاشرتی تبدیلی کو آگے بڑھانے کی صلاحیت بہت زیادہ ہے۔
چیئرمین سینیٹ سید یوسف رضا گیلانی نے کہا کہ نوجوان نسل کو ملک کے جمہوری عمل میں شامل کر نے سے اداروں کو تقویت ملتی ہے۔قانون سازی کے ایوانوں میں نوجوانوں کی شرکت کا رجحان دنیا بھر میں فروغ پا رہا ہے اور قانون سازی کے عمل میں نوجوانوں کی شمولیت ملک کےلئے فائدہ مند ثابت ہوتی ہے یہ اس بات کو بھی یقینی بناتی ہے کہ حکومتی پالیسیاں نوجوان کی امنگوں کی عکاس ہوتی ہیں۔
چیئرمین سینیٹ سید یوسف رضا گیلانی نے کہا کہ تاریخی طور پر نوجوانوں نے سیاسی نظام کی تشکیل اور سماجی تبدیلی کو آگے بڑھانے میں اہم کردار ادا کیا ہے۔
انہوں نے کہا کہ بانی پاکستان قائداعظم محمد علی جناح نے نوجوان نسل کی صلاحیتوں کو تسلیم کیا اور نوجوانوں پر زور دیا کہ وہ خود کو قومی تعمیر کے لیے تیار کریں۔انہوں نے مزید کہا کہ نوجوان مستقبل کے معمار ہیں اور نوجوانوں کی مہارتوں اور صلاحیتوں کو ملکی مفاد کے استعمال میں لانا وقت کی اہم ضرورت ہے۔
چیئرمین سینیٹ کا کہنا تھا کہ سینیٹ انٹرنشپ پروگرام نوجوان کو پارلیمانی عمل سے منسلک کرنے کے لیے ایک منظم راستہ فراہم کرے گا۔
سید یوسف رضا گیلانی نے کہا کہ نوجوانوں نے انٹرنشپ پروگرام سے قانون سازی کے طریقہ کار، پالیسی سازی اور دفتری امورسے متعلق نمایاں آگاہی حاصل کی۔ نوجوانوں کا پارلیمنٹ ہاﺅس میں کام کا تجربہ ان کے روشن مستقبل کی ضمانت ثابت ہوگااورنوجوانوں کو نا صرف پارلیمنٹیرین کے ساتھ کام کرنے کا موقع ملا بلکہ ایوان بالاکے اعلیٰ حکام کے تجربے سے بھی مستفید ہوئے۔
سیکرٹری سینیٹ سید حسنین حیدر نے طلبا و طالبات کو انٹرنشپ مکمل کرنے پر مبارکباد پیش کی۔سید حسنین حیدر نے چیئرمین سینیٹ سید یوسف رضا گیلانی کا بھی شکریہ ادا کیا جنہوں نےسینیٹ سیکرٹریٹ نے تین سال کے وقفے کے بعد دوبارہ انٹرن شپ پروگرام شروع کرنے اور اس کا دائرہ کار بڑھانے کی اجازت دی۔
اس موقع پر انٹرنشپ پروگرام مکمل کرنے والے طلبہ میں سے ایان علی بلوچ ،دایان احمداور امامہ سمیت دیگر نے چیئرمین سینیٹ سید یوسف رضا گیلانی اور سینیٹ سیکرٹریٹ کے اعلیٰ حکام کا تہہ دل سے شکریہ ادا کرتے ہوئے کہا کہ ان کا ایوان بالا میں انٹرنشپ پروگرام کا یہ تجربہ انتہائی کامیاب رہا ہے ،سینیٹ سیکرٹریٹ میں کام کرنے سے نا صرف انہیں دفتری امور ،قانون سازی کو سمجھنے میں مدد ملی بلکہ پارلیمنٹیرین کے تجربہ سے بھی مستفید ہونے کا موقع ملا۔
ایوان بالا کے اعلیٰ حکام کے بھرپور تعاون اور مدد کےلئے ہم سب بہت مشکور ہیں اورا نہیں خراج تحسین پیش کرتے ہیں۔بعد ازیں چیئرمین سینیٹ سید یوسف رضا گیلانی نے انٹرنشپ پروگرام مکمل کرنے والے طلباءو طالبات میں سرٹیفیکیٹس بھی تقسیم کیے۔
