اسلام آباد، 30 جنوری(اے پی پی): وفاقی وزیرداخلہ محسن نقوی نے ایف ایٹ جناح ایونیو انٹرچینج اور ایف ٹین راؤنڈ آباؤٹ منصوبوں کا دورہ کیا اور منصوبوں پر جاری تعمیراتی سرگرمیوں کا جائزہ لیا۔
وزیرداخلہ محسن نقوی نے دونوں منصوبوں پر ہونے والی پیشرفت کا معائنہ کیا۔انہوں نے42 روز میں انڈر پاس کی تکمیل کے بعد فلائی اوور منصوبے کو بھی ریکارڈ مدت میں مکمل کرنے کا ٹاسک دیا اور دونوں منصوبوں کی جلد تکمیل کے لیے احکامات دیئے۔
وزیرداخلہ محسن نقوی نے جناح ایونیو انٹرچینج فلائی اوور منصوبے پر کام کی رفتار تیز کرنے کی ہدایت دی ،فروری کے دوسرے ہفتے تک فلائی اوور کو ٹریفک کیلئے کھول دیا جائے گا۔
وفاقی وزیرداخلہ نے ہدایت جاری کی کہ سپیڈ کے ساتھ معیار کو ہرصورت برقرار رکھا جائے۔ انہوں نے کہا کہ تعمیراتی کاموں کے ساتھ پراجیکٹس کے اطراف بیوٹیفکیشن کا کام بھی جاری رکھا جائے۔
وزیرداخلہ محسن نقوی نے ایف ٹین راؤنڈ آباؤٹ توسیعی منصوبے پر کام کی رفتار کا بھی جائزہ لیا اور منصوبے کو فروری کے پہلے ہفتے میں مکمل کرنے کا ٹاسک دیا۔
محسن نقوی نے کہا کہ منصوبوں کی تکمیل سے شہریوں کو ٹریفک جام سے نجات ملے گی۔ان کا کہنا تھا شہریوں کو آمدورفت میں بہت سہولت ملے گی، سگنل فری کوریڈور پر سفر سے وقت اور ایندھن کی بچت ہو گی ۔
اس موقع پر چیئرمین سی ڈی اے محمد علی رندھاوا نے منصوبوں پر پیش رفت بارے بریفنگ دی۔وفاقی سیکرٹری داخلہ خرم علی آغا، نیسپاک کے متعلقہ حکام اور اعلی افسران بھی اس موقع پر موجود تھے۔
