اسلام آباد،10 فروری (اے پی پی ): ایک اور وعدہ پورا، قذافی کے بعد نیشنل اسٹیڈیم کراچی بھی چیمپئنز ٹرافی کی میزبانی کے لیے پوری طرح تیار ہے۔چئیرمین پی سی بی محسن نقوی کی ذاتی مانیٹرنگ اور ورکرز کی دن رات محنت سے 120 روز میں منصوبہ مکمل ہوگیا ہے۔
رنگارنگ افتتاحی تقریب سے نیشنل سٹیڈیم کراچی کا افتتاح کل شام ہوگا جس میں معروف گلوکار علی ظفر، شفقت امانت علی اور ساحر علی بگا اپنی آواز کا جادو جگائیں گے آتش بازی اور لائٹس شو کا شاندار مظاہرہ بھی ہو گا جبکہ عوام کا داخلہ مفت ہو گا۔
اس حوالے سے چیئرمین بی سی بی محسن نقوی نے کہا کہ 28ستمبر کو نیشنل سٹیڈیم کے تعمیراتی کاموں کا آغاز ہوا، الحمدللہ 31 جنوری کو تعمیراتی کام مکمل کر لیا انہوں نے کہا کہ پویلین کی عمارت کو مکمل گرا گرا کر تعمیر کیا گیا ہے۔
محسن نقوی نے کہا کہ ہر انکلوژرز میں نئی کرسیاں لگائی گئی ہیں جبکہ نئی ایل ای ڈی لائٹس، جدید سکور سکرینز اور گرل نصب کر کے شائقین کرکٹ کے بہتر ویو کے لئے جنگلا ختم کر دیا گیا ہے۔انہوں نے کہا کہ تمام ہاسپٹلٹی باکسز کی تزئین و آرائش اور نئی رنگ روڈ اور پیڈسٹرین برج کی تعمیر بھی کی گئی ہے۔
چئیر مین پی سی بی محسن نقوی نے نیشنل سٹیڈیم کراچی کی تعمیر میں حصہ لینے والے مزدوروں کی محنت کو سراہا۔انہوں نے کہا کہ چیمپئنز ٹرافی کی ٹیمز کے کھلاڑیوں کو بہترین سہولتیں فراہم کریں گے۔
