اسلام آباد،10 فروری (اے پی پی): وزیر اعظم کی کوآرڈینیٹر برائے موسمیاتی تبدیلی رومینہ خورشید عالم نے کہا ہے کہ ماحولیاتی تحفظ کےگلوبل چیلنجز سے نمٹنے کے لئیےکثیرالجہتی تعاون کی ضرورت ہے، پاکستان ماحولیاتی لچکدار انفراسٹرکچر پر وسائل کو متحرک کرنے کے لیے بین الاقوامی شراکت داروں کے ساتھ فعال طور پر کام کر رہا ہے۔
آج ایک تقریب سے خطاب کرتے ہوئے، انہوں نے اس بات پر زور دیا کہ عالمی چیلنجوں جیسے کہ موسمیاتی تبدیلی اور ڈیزاسٹر مینجمنٹ سے نمٹنے کے لیے کثیر جہتی تعاون ضروری ہے۔ رومینہ خورشید عالم نے موسمیاتی تبدیلیوں کے اثرات کو کم کرنے اور موافقت کی کوششوں کو بڑھانے کے لیے حکومت کے عزم کا اظہار کیا۔
انہوں نے کہا کہ پاکستان نے پانی، زراعت اور ڈیزاسٹر مینجمنٹ جیسے اہم شعبوں میں لچک کو مضبوط بنانے پر توجہ مرکوز کرتے ہوئے اپنا قومی موافقت کا منصوبہ بنایا ہے۔ انہوں نے کہا کہ زندہ انڈس اقدام ایک اور اہم پروگرام ہے جس کا مقصد سندھ طاس کی ماحولیاتی صحت کو بحال کرنا ہے۔
