ریاض ۔19فروری (اے پی پی):وفاقی وزیر اطلاعات، نشریات، قومی ورثہ و ثقافت عطاء اللہ تارڑ اور سعودی عرب کے وزیر برائے میڈیا سلمان بن یوسف الدوسیری کے درمیان بدھ کو یہاں سعودی میڈیا فورم کے موقع پر اہم ملاقات ہوئی جس میں پاکستان اور سعودی عرب کے درمیان مشترکہ پروڈکشن، گانے، فلم اور ڈاکومنٹریز کی تیاری کے لئے جوائنٹ کمیٹی تشکیل دینے اور صحافیوں کے تبادلے اور تربیتی پروگراموں سمیت مختلف شعبوں میں تعاون بڑھانے پر اتفاق ہوا۔
وفاقی وزیر اطلاعات نے سعودی عرب کے وزیر برائے میڈیا کو سعودی میڈیا فورم کے چوتھے ایڈیشن کے انعقاد پر مبارکباد پیش کی۔ ملاقات میں پاکستان اور سعودی عرب کے درمیان میڈیا کے شعبوں میں تعلقات کو فروغ دینے اور مشترکہ تعاون کو بڑھانے پر تبادلہ خیال کرتے ہوئے دونوں رہنمائوں نے غلط معلومات اور پروپیگنڈے سے نمٹنے کے لئے مل کر کام کرنے کی اہمیت پر زور دیا۔
اس موقع پر وفاقی وزیر اطلاعات نے کہا کہ سعودی عرب ہمارا دوسرا گھر ہے۔ دونوں ممالک کے درمیان قریبی تعاون سے خطے میں امن اور استحکام کو فروغ دینے میں مدد ملے گی۔
وفاقی وزیر نے کہا کہ سعودی وژن 2030 کی حمایت سمیت مختلف شعبوں میں تعلقات کو مضبوط بنانے کے لئے پرعزم ہیں۔ انہوں نے کہا کہ پاکستان اور سعودی عرب کے درمیان ڈیجیٹل سرمایہ کاری اور تکنیکی تعاون کے لئے سنہری مواقع موجود ہیں۔
عطاء اللہ تارڑ نے کہا کہ سعودی میڈیا فورم کے زیر اہتمام کانفرنس محض تقریب نہیں بلکہ یہ پاکستان سمیت دنیا بھر کے میڈیا کے لئے ایک موقع ہے کہ وہ باہمی تعاون کی نئی راہیں تلاش کریں۔
انہوں نے کہا کہ سعودی عرب کے شاہ سلمان بن عبدالعزیز کی زیر پرستی ولی عہد شہزادہ محمد بن سلمان کی قیادت میں سعودی عرب وژن 2030ء کے اہداف سے آگے بڑھ چکا ہے۔ سعودی ولی عہد شہزادہ محمد بن سلمان نے سعودی عرب کی مثالی ترقی میں تاریخی کردار ادا کیا ہے، ان کی قائدانہ صلاحیتوں کو خراج تحسین پیش کرتے ہیں۔
وفاقی وزیر اطلاعات نے کہا کہ وژن 2030ءکے تحت سعودی عرب ہر شعبے کی سرگرمیوں کا مرکز بن چکا ہے۔ انہوں نے کہا کہ پاکستان سعودی عرب برادرانہ تعلقات اقتصادی شراکت داری میں تبدیل ہو رہے ہیں، پاکستان اور سعودی عرب کے درمیان دہائیوں پر محیط برادرانہ تعلقات ہر گزرتے دن کے ساتھ مزید مضبوط ہو رہے ہیں۔
اس موقع پر سعودی وزیر برائے میڈیا نے کہا کہ سعودی پاکستان سپریم کوآرڈینیشن کونسل کی آئندہ میٹنگ پاکستان میں ہوگی۔ انہوں نے کہا کہ پاکستانیوں کی بڑی تعداد سعودی عرب کی ترقی میں اہم کردار ادا کر رہی ہے، پاکستان کے ساتھ اطلاعات سمیت تمام شعبوں میں تعاون کا فروغ ہماری ترجیح ہے۔
