اسلام آباد۔20فروری (اے پی پی):وفاقی وزیرداخلہ و انسداد منشیات محسن نقوی سے پاکستان میں قطر کے سفیرعلی مبارک علی عیسیٰ الخطیر نے ملاقات کی جس میں باہمی دلچسپی کے امور، دوطرفہ تعلقات اور مختلف شعبوں میں تعاون بڑھانے پر تبادلہ خیال کیا گیا۔
ملاقات میں قطر میں قید پاکستانی شہریوں کی رہائی اورانسداد منشیات کے سلسلے میں باہمی اشتراک کار بڑھانے پر اتفاق کیا گیا۔ قطر کے سفیر نے وزیر داخلہ محسن نقوی کو قطر کے دورے کی دعوت دی۔ وزیر داخلہ محسن نقوی نے کہا کہ قطر سے انتہائی قریبی تعلقات ہیں، جلد قطر کا دورہ کرکے قطری ہم منصب سے ملاقات کروں گا۔
انہوں نے کہا کہ انسداد منشیات کے حوالے سے خلیجی ممالک کی کانفرنس اپریل میں اسلام آباد میں ہورہی ہے۔اس کانفرنس میں قطر کے انسداد منشیات ڈیپارٹمنٹ کے سربراہ کو شرکت کی دعوت دی گئی ہے۔ وزیر داخلہ محسن نقوی نے اس بات پر زور دیا کہ انسداد منشیات کے سلسلے میں دوست ممالک کے ساتھ قریبی اشتراک کار چاہتے ہیں۔
قطر کے سفیر نے کہا کہ پاکستان برادر اسلامی ملک ہے، تعلقات کو انتہائی اہمیت دیتے ہیں۔
