لاہور۔ 25 فروری ( اے پی پی ):صوبائی وزیرصحت خواجہ سلمان رفیق کی زیر صدارت محکمہ سپیشلائزڈ ہیلتھ کیئر اینڈ میڈیکل ایجوکیشن میں اہم اجلاس منعقد ہوا۔اجلاس میں نواز شریف انسٹی ٹیوٹ آف کارڈیالوجی سرگودھا، نواز شریف انسٹی ٹیوٹ آف کارڈیالوجی لاہور اور نواز شریف انسٹی ٹیوٹ آف کینسر ٹریٹمنٹ اینڈ ریسرچ لاہور پر جاری پیش رفت کا جائزہ لیا گیا۔
اجلاس میں سیکرٹری صحت پنجاب عظمت محمود نے شرکت کی۔ اجلاس میں وائس چانسلر کنگ ایڈورڈ میڈیکل یونیورسٹی پروفیسر محمود ایاز، سپیشل سیکرٹری ڈویلپمنٹ ذیشان شبیر رانا، ایڈیشنل سیکرٹریز ڈاکٹر وحید اصغر اور اشفاق الرحمن اور چیف پلاننگ آفیسر عبدالحق بھٹی نے شرکت کی۔اجلاس میں آئی ڈیپ کے افسران نے تینوں اہم منصوبہ جات پر بریفنگ دی۔
صوبائی وزیرصحت خواجہ سلمان رفیق نے اس موقع پر اظہارخیال کرتے ہوئے کہا کہ آئی ڈیپ کو صحت کے تینوں اہم ترین منصوبہ جات کو مقررہ وقت پر مکمل کرنے کی ہدایت کی گئی ہے۔الحمدللہ پنجاب کی عوام کیلئے صحت کے تینوں پراجیکٹس کیلئے فنڈز کی کوئی کمی نہیں ہے۔
انہوں نے کہا کہ وزیراعلیٰ پنجاب مریم نواز شریف صوبہ بھر کے کارڈیک ہسپتالوں کی صلاحیت میں واضح بہتری لانا چاہتی ہیں۔وزیر اعلیٰ پنجاب کے کارڈیک پروگرام کو انشاء اللہ کامیاب بنائیں گے۔ کارڈیک ہسپتالوں میں ایچ آر کی کمی کو بھی ترجیحی بنیادوں پر پورا کر رہے ہیں۔
خواجہ سلمان رفیق نے کہا کہ نواز شریف انسٹی ٹیوٹ آف کینسر ٹریٹمنٹ اینڈ ریسرچ کے 615 بستروں پر مشتمل پہلے فیز پر تیزی سے کام جاری ہے۔یہ کینسر کیئر ہسپتال اپنی نوعیت کا منفرد ہسپتال ہوگا۔ نواز شریف انسٹی ٹیوٹ آف کینسر ٹریٹمنٹ اینڈ ریسرچ کے کینسر کیئر کلینک کو 30 ستمبر 2025 تک عوام کیلئے کھول دیں گے۔نواز شریف انسٹی ٹیوٹ آف کارڈیالوجی سرگودھا کی او پی ڈی کو 30 جون 2025 تک عوام کیلئے کھول دیں گے۔
انہوں نے کہا کہ صحت کے تینوں پراجیکٹس کو مقررہ ٹائم لائن کے مطابق مکمل کیا جا رہا ہے۔
