اسلام آباد ، 7 مارچ(اے پی پی ): ڈائریکٹر جنرل ایف آئی اے جان محمد نے کہا ہے کہ 7 مارچ شہداء پولیس کی لازوال قربانیوں کو خراج تحسین پیش کرنے کا دن ہے۔
انٹرپول فرض کی ادائیگی کے دوران جانوں کا نذرانہ پیش کرنے والے پولیس افسران کے عالمی دن کی مناسبت سے جاری ویڈیو بیان میں انہوں نے کہا کہ یہ ان عظیم لوگوں کا دن جنہوں نے ہمارے امن و سلامتی کی خاطر اپنی جانوں کا نذرانہ پیش کیا۔
ڈی جی ایف آئی اے نے کہا کہ مادر وطن کی خاطر جان نچھاور کرنے والے بہادر سپوتوں کی عظیم قربانیوں کو کبھی بھی فراموش نہیں کیا جائے گا۔ انہوں نے کہا کہ آج کے دن ہم عالمی سطح پر تمام شہداء پولیس کو خراج تحسین پیش کرتے ہیں اور ان کے اہل خانہ کے ساتھ یکجہتی کا اظہار کرتے ہیں۔
انہوں نے کہا کہ آج کا دن پوری دنیا کے قانون نافذ کرنے والے اداروں کے درمیان اتحاد اور یکجہتی کا مظہر ہے۔
ڈی جی ایف آئی اے نے کہا کہ آج دنیا بھر کے ان بہادر پولیس افسران کو خراج عقیدت پیش کرتے ہیں جنہوں نے عوام کے تحفظ کے لیے اپنی جانوں کا نذرانہ پیش کیا۔ انہوں نے کہا کہ جان کا نذرانہ پیش کرنے والے افسران کا حوصلہ، بہادری اور فرض شناسی ہمارے لیے مشعل راہ ہے۔
