اسلام آباد،14 فروری(اے پی پی ): وزیر اعظم کے معاون خصوصی برائے صنعت و پیداوار ہارون اختر خان کی زیر صدارت فرٹیلائزر ریویو کمیٹی کا اجلاس منعقد ہوا، جس میں ربیع سیزن 2025 کے دوران یوریا کی طلب و رسد کی صورتحال کا تفصیلی جائزہ لیا گیا۔
اجلاس میں کسانوں کو کھاد کی مقررہ قیمت پر بلاتعطل فراہمی یقینی بنانے پر زور دیا گیا۔ ہارون اختر خان نے ہدایت دی کہ کھاد کے پیداواری یونٹس کو مکمل صلاحیت کے ساتھ چلایا جائے تاکہ زرعی شعبے کی ضروریات پوری کی جا سکیں۔
انہوں نے کہا کہ کھاد پاکستان کے زرعی شعبے کے لیے نہایت اہم ہے اور حکومت وزیر اعظم پاکستان کے وژن کے مطابق صنعتوں کی بھرپور معاونت کرے گی۔ اس موقع پر انہوں نے قیمتوں میں یکسانیت کو یقینی بنانے کی بھی یقین دہانی کرائی۔
