اسلام آباد،14 فروری(اے پی پی ): کنگ سلمان ہیومینیٹیرین ایڈ اینڈ ریلیف سینٹر نے پاکستان میں شدید سردی اور قدرتی آفات سے متاثرہ کمیونٹیز کی مدد کے لیے موسم سرما امدادی منصوبہ کامیابی سے مکمل کر لیا۔ اس منصوبے کے تحت ملک بھر کے 52 اضلاع میں 50,000 ونٹر کٹس تقسیم کی گئیں۔
یہ منصوبہ نیشنل ڈیزاسٹر مینجمنٹ اتھارٹی (NDMA) اور پروونشل ڈیزاسٹر مینجمنٹ اتھارٹیز (PDMA) کے تعاون سے مکمل کیا گیا۔ خیبر پختونخوا، گلگت بلتستان، بلوچستان، آزاد جموں و کشمیر، سندھ اور پنجاب کے سب سے زیادہ متاثرہ اضلاع میں یہ امدادی سامان تقسیم کیا گیا، تاکہ مستحق خاندانوں کو شدید سردی سے تحفظ فراہم کیا جا سکے۔
ہر ونٹر کٹ میں دو اعلیٰ معیار کی پالیسٹر رضائیاں، مردوں اور خواتین کے لیے گرم شال کٹس، اور بچوں و بڑوں کے لیے موسم سرما کے کپڑے شامل تھے۔ یہ تقسیم صوبائی حکومتوں کے تعاون اور حیات فاؤنڈیشن کی شراکت داری سے شفاف طریقے سے مکمل کی گئی۔
اس منصوبے سے 3 لاکھ 37 ہزار سے زائد افراد کو فائدہ پہنچا، جو کنگ سلمان ریلیف سینٹر کے انسانی ہمدردی کے مشن اور ضرورت مند افراد کی مدد کے عزم کو مزید مستحکم کرتا ہے۔ کنگ سلمان ریلیف عالمی سطح پر قدرتی آفات اور شدید موسم سے متاثرہ افراد کی مدد کے لیے اپنی خدمات جاری رکھے گا۔
