ملتان :23 مارچ (اے پی پی):ملک بھر کی طرح ملتان میں بھی یوم پاکستان ملی جوش و جذبے سے منایا جا رہا ہے۔مختلف تنظیموں،سول سوسائٹی اور اداروں کی طرف سے ریلیوں،سیمینارز اور تقریبات کا انعقاد کیا گیا جس میں ماں دھرتی اور وطن عزیز کی سلامتی کےلئے دعائیں اور وطن کے شہداء کو خراجِ عقیدت پیش کیا گیا۔
23 مارچ کے موقع پر ضلعی انتظامیہ ملتان کی جانب سے ایک پروقار تقریب کا انعقاد کیا گیا۔ اس موقع پر کمشنر عامر کریم خاں اور ڈپٹی کمشنر محمد علی بخاری کے دفتر میں پرچم کشائی کی تقریب منعقد ہوئی اور ایک منٹ کی خاموشی کے بعد سائرن بجائے گئے۔
ریسکیو 1122 اور سول ڈیفنس کے چاک و چوبند دستوں نے سلامی پیش کی۔تقریب میں ملکی سلامتی و ترقی کیلئے خصوصی دعا کرائی گئی۔
اس موقع پر تقریب سے خطاب کرتے ہوئے کمشنر ملتان عامر کریم خاں نے پوری قوم کو یوم پاکستان کی مبارکباد اور شہدا کی قربانیوں کو خراج تحسین پیش کیا۔انہوں نے کہا کہ 23مارچ ہمیں قیام پاکستان کے سنہری اغراض و مقاصد کی یاد دہانی کراتا ہے۔اس عظیم موقع پر ہم سب کو پاک سر زمین کے تقدس اور تحفظ کا عہد کرنا ہو گا۔
کمشنر نے مزید کہا کہ یوم پاکستان پر اتحاد، ایمان اور نظم و ضبط کے سنہری اصولوں کو یاد رکھنا ہماری ذمہ داری یے۔
ڈپٹی کمشنر محمد علی بخاری کا کہنا تھا کہ 23 مارچ ہمیں حصول پاکستان کی بھرپور جدوجہد کے آغاز کی یاد دلاتا ہے۔قائد اعظم اور دیگر رہنماؤں کے وژن کے مطابق وطن کو بلندیوں پر گامزن کرینگے۔
ڈپٹی کمشنر نے کہا کہ ہمیں یوم پاکستان پر عہد کرنا ہو گا کہ وطن عزیز کو ترقی کا مرکز بنائیں گے۔تقریب میں شرکاء اور عوام الناس نے “پاکستان زندہ باد” قائد اعظم زندہ باد کے فلگ شگاف نعرے بھی لگائے گئے۔
