اسلام آباد،2اپریل(اے پی پی):وزیراعظم محمد شہباز شریف سے وزیر اعلیٰ بلوچستان سرفراز بگٹی نے ملاقات کی، جس میں دونوں رہنماؤں نے بلوچستان کی موجودہ اقتصادی، سماجی اور امن و امان کی صورتحال پر تفصیلی گفتگو کی۔ وزیر اعلیٰ بلوچستان نے وزیر اعظم کو عید الفطر کی مبارکباد پیش کی اور صوبے میں جاری ترقیاتی منصوبوں کی پیشرفت سے آگاہ کیا۔
ملاقات کے دوران وفاقی حکومت کی جانب سے بلوچستان کے لیے جاری ترقیاتی منصوبوں پر بھی تبادلہ خیال کیا گیا۔ وزیر اعظم شہباز شریف نے اس بات پر زور دیا کہ وفاقی حکومت بلوچستان کی ترقی کے لیے ہر ممکن تعاون فراہم کرے گی۔
انہوں نے اس عزم کا اعادہ کیا کہ بلوچستان کی ترقی وفاقی حکومت کی اولین ترجیحات میں شامل ہے اور اس مقصد کے لیے تمام ضروری اقدامات کیے جائیں گے۔
