اسلام آباد،09اپریل(اے پی پی):وفاقی وزیر داخلہ محسن نقوی سے پاکستان کے دورے پر آئے امریکی وفد کے سربراہ و امریکی محکمہ خارجہ کے سینئر عہدیدار ایریک میئر نے بدھ کو یہاں ملاقات کی ہے۔
ملاقات میں پاک امریکہ تعلقات سمیت باہمی دلچسپی کے امور اور دو طرفہ تعاون پر تفصیلی تبادلہ خیال کیا گیا۔ ملاقات میں دہشت گردی، سمگلنگ اور انسداد منشیات کے شعبوں میں باہمی اشتراک کار کو بڑھانے پر بھی بات چیت کی گئی۔ ایریک میئر نے جعفر ایکسپریس پر دہشت گردوں کے حملے کی مذمت کی۔انہوں نے جانی نقصان پر افسوس کا اظہار کرتے ہوئے متاثرہ خاندانوں سے تعزیت کی۔
وزیر داخلہ محسن نقوی کا کہنا تھا کہ پاکستان منرلز انویسٹمنٹ فورم کے ذریعے امریکی کمپنیاں پاکستان میں سرمایہ کاری کے بے پناہ مواقعوں سے فائدہ اٹھا سکتی ہیں،اس ضمن میں امریکی وفد کا دورہ اہم سنگ میل ثابت ہوگا۔ایریک میئر نے پاکستان منرلز انویسٹمنٹ فورم 2025 کے تحت فراہم کردہ مواقعوں میں دلچسپی کا اظہار کیا۔
وزیر داخلہ محسن نقوی نے ایریک مئیر کو انسداد دہشتگردی کے سلسلے میں لئے گئے اقدامات سے آگاہ کیا۔انہوں نے کہا کہ دہشتگردی صرف پاکستان کی جنگ نہیں، اس سے نمٹنے کیلئے عالمی برادری کو پاکستان سے تعاون کرنا ہو گا۔ ایریک مئیر نے مطلوب دہشت گرد شریف اللہ کی گرفتاری میں تعاون پر پاکستان کا شکریہ ادا کیا۔
قائم مقام امریکی سفیر نیٹلی بیکر، وزیر مملکت داخلہ طلال چوہدری اور سیکرٹری داخلہ خرم آغا بھی اس موقع پر موجود تھے۔
ایریک مئیر کی سربراہی میں امریکی وفد پاکستان منرلز انویسٹمنٹ فورم 2025 میں شرکت کر رہا ہے۔
