اسلام آباد، 10 اپریل (اے پی پی): وزیرِاعظم محمد شہباز شریف کی زیر صدارت برآمدات سہولت اسکیم(ای ایف ایس) کے حوالے سے ایک اہم جائزہ اجلاس منعقد ہوا جس میں اسکیم کو مزید مؤثر بنانے اور برآمدی شعبے کا اس سے بھرپور استفادہ یقینی بنانے کیلئے قائم کردہ کمیٹی کی عبوری سفارشات پیش کی گئیں۔
وزیرِاعظم نے اس موقع پر کہا کہ ملکی آمدن میں برآمدات کے ذریعے اضافہ حکومت کی اولین ترجیحات میں شامل ہے۔ انہوں نے کمیٹی کو ہدایت کی کہ اسکیم کے تحت برآمدی صنعتوں کے خام مال اور مشینری کی درآمد پر مزید سہولیات فراہم کرنے کیلئے شعبے کے ماہرین سے مشاورت کو یقینی بنایا جائے۔
وزیرِاعظم نے ہدایت دی کہ کمیٹی مشاورت کے بعد عبوری سفارشات کو حتمی شکل دے کر جلد رپورٹ پیش کرے۔ انہوں نے آئندہ بجٹ کی تیاری کے دوران صنعتوں اور کاروباری تنظیموں سے مشاورت اور ان کی تجاویز کو بجٹ میں شامل کرنے کی بھی ہدایت کی۔
وزیرِاعظم نے کہا کہ مقامی صنعت کو لیول پلئینگ فیلڈ کی فراہمی حکومت کی ترجیح ہے، تاکہ وہ عالمی منڈی میں مؤثر طور پر مسابقت کر سکے۔ بریفنگ کے دوران بتایا گیا کہ پیداواری لاگت کو کم کرنے اور ملکی برآمدات کو عالمی منڈیوں میں مسابقتی بنانے کیلئے یہ اسکیم متعارف کرائی گئی تھی۔
اجلاس میں وفاقی وزراء احسن اقبال، احد خان چیمہ، محمد اورنگزیب، علی پرویز ملک، سردار اویس خان لغاری، مشیر وزیرِاعظم سید توقیر شاہ، وزیرِاعظم کے کوآرڈینیٹر رانا احسان افضل، چیئرمین ایف بی آر راشد محمود لنگڑیال اور برآمدی صنعت سے تعلق رکھنے والی معروف شخصیات نے شرکت کی۔
