اسلام آباد، 16 اپریل (اے پی پی): وزیرِ اعظم محمد شہباز شریف سے ایسوسی ایشن آف چارٹرڈ سرٹیفائیڈ اکاؤنٹنٹس کے سات رکنی وفد نے عالمی چیف ایگزیکٹیو ہیلن برانڈ کی سربراہی میں ملاقات کی۔
وزیرِ اعظم نے وفد کو پاکستان آمد پر خوش آمدید کہتے ہوئے کہا کہ پاکستان کی خوش قسمتی ہے کہ اللہ تعالیٰ نے اسے نوجوان اور باصلاحیت افرادی قوت سے نوازا ہے۔ اُنہوں نے کہا کہ حکومت ترجیحی بنیادوں پر نوجوانوں کو بین الاقوامی معیار کے ہنر اور تربیت سے لیس کرنے کے اقدامات کر رہی ہے۔
وزیرِ اعظم نے زور دیا کہ شفافیت اور گورننس کی بہتری کیلئے تھرڈ پارٹی ویلیڈیشن ہر سرکاری منصوبے کا لازمی جزو ہے اور حکومتی کارکردگی اور نظامِ حکومت کی بہتری حکومت کے اہم اہداف میں شامل ہے۔
انہوں نے کہا کہ فِچ کی جانب سے پاکستان کی سرمایہ کاری درجہ بندی میں بہتری ایک خوش آئند امر ہے، تاہم ملک کو اقتصادی طور پر مستحکم کرنے کیلئے مزید محنت کی ضرورت ہے۔
وزیرِ اعظم نے کہا کہ عالمی سطح پر پاکستانی افرادی قوت کی مسابقت کو بڑھانے میں ایسوسی ایشن آف چارٹرڈ سرٹیفائیڈ اکاؤنٹنٹس (ACCA) نئی پیشہ ورانہ مہارتوں کی تربیت میں کلیدی کردار ادا کر سکتی ہے۔ حکومت ایسوسی ایشن کے تعاون سے سرکاری اداروں کی استعداد بڑھانے کی مکمل حوصلہ افزائی کرے گی۔اس موقع پر وزیرِ اعظم نے متعلقہ حکام کو ہدایت کی کہ وہ ایسوسی ایشن سے تعاون میں اضافے اور مستقبل کے لائحہ عمل کیلئے مذاکرت کریں۔
ملاقات میں نائب وزیرِ اعظم و وزیرِ خارجہ محمد اسحاق ڈار، وفاقی وزراء خالد مقبول صدیقی، احد خان چیمہ، مشیر وزیرِ اعظم سید توقیر شاہ، چیئرمین ہائیر ایجوکیشن کمیشن ڈاکٹر مختار احمد اور دیگر اعلیٰ حکام نے شرکت کی۔
وفد نے وزیرِ اعظم کو پاکستان میں اے سی سی اے کی سرگرمیوں، اس کی تاریخ اور ملکی معیشت میں اس کے کردار پر بریفنگ دی۔ وفد نے بتایا کہ اے سی سی اے کے پاکستان سے تعلق رکھنے والے 13 ہزار ارکان دنیا بھر میں خدمات سرانجام دے رہے ہیں جبکہ 40 ہزار سے زائد طلباء و طالبات اس وقت ممبرشپ کے حصول کیلئے زیر تعلیم ہیں۔
وفد نے ہائیر ایجوکیشن کمیشن کی جانب سے اے سی سی اے ارکان کو ماسٹرز ڈگری کے مساوی تسلیم کرنے پر شکریہ ادا کیا اور پاکستان کے گرین اکانومی ٹرانسفارمیشن پلان میں بھرپور شرکت اور تعاون کی خواہش ظاہر کی۔
وفد نے ماحولیاتی تبدیلی، اکاؤنٹینسی و آڈٹ کے شعبوں میں جدت، آؤٹ سورسنگ اور کارپوریٹ خدمات میں پاکستان کے ساتھ اشتراکِ عمل کی خواہش کا اظہار کرتے ہوئے وزیرِ اعظم کی قیادت میں ملکی معیشت کی بہتری کیلئے حکومتی اقدامات کو سراہا۔
وزیرِ اعظم نے اختتام پر متعلقہ حکام کو ہدایت کی کہ وہ ایسوسی ایشن کے ساتھ مذاکرت کرکے آئندہ کے لائحہ عمل کو حتمی شکل دیں۔
