لاہور، 26 اپریل (اے پی پی):وزیر داخلہ محسن نقوی کا کہنا ہے کہ بھارت پانی روکے گا تو پھر پاکستان جنگ کے لیے تیار ہے۔ وفاقی وزیر برائے داخلہ محسن نقوی نے نیوز کانفرنس کرتے ہوئے کہا کہ ہم بھارت سے زیادہ جنگ کے لیے تیار ہیں، ہم جنگجو قوم ہیں جنگ لگی تو ہم سب مل کر بھارت سے لڑیں گے۔ انھوں نے کہا کہ بھارت کے خلاف پوری قوم متحد ہے اور سب کا موقف ایک ہے۔
محسن نقوی نے کہا کہ کالعدم بی ایل اے اور ‘را’ دو نام ایک تنظیم ہے، کالعدم بی ایل اے کے لوگ کن سے ملاقاتیں کرتے ہیں ہم سب جانتے ہیں، جن دہشت گردوں کو ہم پکڑنا چاہتے ہیں بھارتی ٹی وی پر ان کے انٹرویو چلتے ہیں۔ انھوں نے کہا کہ پاکستان میں آئے روز دہشت گردی کا واقعہ ہوتا ہےکیا کبھی بھارت نے مذمت کی بلکہ بھارت میں تو انہیں ہیرو کہا جاتا ہے۔
وزیر داخلہ نے کہا کہ غیر جانبدار فریق پہلگام اور جعفرآباد واقعے کی تحقیقات کریں، پاکستان شفاف تحقیقات کا مطالبہ کرتا ہے اور بھرپور تعاون کرنے کے تیار ہے۔ ان کا کہنا تھا کہ پہلگام واقعے میں پاکستان کا براہ راست یابالواسطہ کسی بھی قسم کا کوئی تعلق نہیں ہے جبکہ بلوچستان اور خیبرپختونخوا میں دہشت گردی کے واقعات میں بھارت کے ملوث ہونے کے ٹھوس ثبوت ہمارے پاس موجود ہیں۔ وفاقی وزیر داخلہ نے کہا کہ پاکستان اس وقت معاشی ترقی کررہا ہے، پاکستان میں استحکام آرہا ہے، اس دوران اس طرح کے واقعے کا نقصان پاکستان کو ہے جبکہ بھارت کو اس کا فائدہ ہے۔انھوں نے کہا کہ یہ بات بہت اہم ہے کہ جب بھی بھارت میں کوئی غیر ملکی رہنما دورے پر آیا ہوتا ہے تو اس دوران ایسے واقعات کیوں ہوتے ہیں؟ ایسا تیسری بار ہوا ہے کہ باہر کا رہنما دورے پر تھا اور پہلگام میں یہ واقعہ ہوا۔
انھوں نے کہا کہ پاکستان کا واضح مؤقف ہے کہ پاکستان پرامن ملک ہے، اگر ہمارے کسی حق کو دبانے کی کوشش کی گئی تو یہ پورے 24 کروڑ لوگ آخری دم تک لڑیں گے۔ وفاقی وزیر داخلہ کا مزید کہنا تھا کہ ہم دنیا بھر میں جہاں بھی دہشتگردی ہو اس کی مذمت کرتے ہیں، ہم نے ہر فورم یہ بات کہی ہے۔انھوں نے کہا کہ حالیہ واقعے پر پاکستان باضابطہ طور پر شفاف اور غیر جانبدار تحقیقات کا مطالبہ کرتا ہے تاکہ بھارتی حملے کے حوالے سے حقائق منظرعام پر آسکیں۔ وزیر داخلہ کا کہنا تھا کہ بھارت نے کشمیر پر قبضہ کیا ہوا ہے، اقوام متحدہ کی قراردادوں کے مطابق مسئلہ حل ہونا چاہیے، پاکستان کشمیر سے متعلق اپنے مؤقف سے پیچھے نہیں ہٹے گا۔
