‘بلٹ ٹرین’ کا آغاز کرکے نواز شریف اور مریم نواز شریف عوام سے اپنے ایک اور وعدے کو پورا کریں گے، مریم اورنگزیب

لاہور، 27 اپریل (اے پی پی):پنجاب میں سینئر وزیر مریم اورنگزیب نے کہا ہے کہ بلٹ ٹرین کا آغاز کر کے نواز شریف اور مریم نواز اپنے ایک اور وعدے کو پورا کریں گے۔مریم اورنگزیب اور وزیر ریلوے کی زیر صدارت اجلاس میں لاہور سے راولپنڈی تک تیز ترین ٹرین چلانے کے منصوبے پر غور کیا گیاوزیر اعلیٰ پنجاب مریم نواز شریف کی ہدایت پر لاہور سے راولپنڈی تک پاکستان کی پہلی تیز ترین ‘بلٹ ٹرین’ چلانے کا فیصلہ کیا گیا ہے۔مریم اورنگزیب نے منصوبے کی فیزیبلٹی، ٹائم لائن کی تیاری کے لئے صوبائی وزیر ٹرانسپورٹ پنجاب بلال اکبر خان ، مشیر وزیرعلیٰ پنجاب شاہد تارڑ، چیئرمین ریلوے ، سی ای او ریلوے پہ مشتمل ورکنگ گروپ تشکیل دے دیا۔ مریم اورنگزیب ورکنگ گروپ کی تجاویز آئندہ ہفتے وزیراعلیٰ کو پیش کریں گی۔ یہ شہروں کے درمیان ٹرین کے ذریعے شہریوں کو جدید سفری سہولیات کی فراہمی کی وزیرِ اعلیٰ پنجاب کی ہدایت پر عملدرآمد کے حوالے سے یہ پہلا اجلاس تھا۔لاہور اور راولپنڈی کے درمیان چلنے والی بلٹ ٹرین سوا دو سے اڑھائی گھنٹے میں فاصلہ طے کرے گی۔ نئے ریل روٹس کی نشاندہی کی جائے گی۔ سینئر صوبائی وزیر کو ریلوے حکام نے ریل نیٹ ورک اور پٹڑی سے متعلق تفصیلی بریفنگ دی۔

اجلاس سے خطاب کرتے ہوئے سینئر صوبائی وزیر مریم اورنگزیب نے کہا کہ بلٹ ٹرین کا آغاز کرکے نواز شریف اور مریم نواز شریف عوام سے اپنے ایک اور وعدے کو پورا کریں گے۔ وزیر اعلیٰ مریم نواز شریف عوام کے لیے سفر کی سستی، تیز ترین اور آرام دہ سہولیات چاہتی ہیں۔ وزیر اعلیٰ پنجاب کا ویژن ہے کہ ٹرین عوامی سواری ہے، اسے جدید معیار پر لانا ہے۔ انھوں نے کہا کہ وزیراعلیٰ پنجاب مریم نواز کی ہدایت پہ لاہور اور راولپنڈی کے ریلوے سٹیشن کی اپ گریڈیشن بھی پلان میں شامل ہے۔ وزیر اعلیٰ پنجاب کی ہدایت کے مطابق محکمہ سیاحت پنجاب کے تعاون سے راولپنڈی تا لاہور ٹریک کو خوبصورت بنانے کی تجویز پر کام کریں گے۔ پنجاب کے صوبائی وزیر ٹرانسپورٹ پنجاب بلال اکبر خان بذریعہ ویڈیو لنک،سیکرٹری ٹرانسپورٹ عمران سکندربلوچ اورسیکرٹری پلاننگ اینڈ ڈویلپمنٹ آصف طفیل  اجلاس میں شریک ہوئے۔