اسلام آباد، 29 مئی (اےپی پی):چیئرمین سی ڈی اے، چیف کمشنر اسلام آباد اور ڈی جی سول ڈیفنس محمد علی رندھاوا کی زیر صدارت سی ڈی اے بورڈ کا دسواں اجلاس منعقد ہوا۔ اجلاس میں سی ڈی اے بورڈ ممبران سمیت دیگر سینئر افسران نےشرکت کی۔سی ڈی اے بورڈ کے اجلاس میں مختلف ایجنڈا آئٹمز زیر غور لائے گئے۔
سی ڈی اے بورڈ کے اجلاس میں انڈسٹریل پلاٹس کے ریٹس کا جائزہ، ٹریڈ کی تبدیلی، پلاٹس کے انضمام اور ذیلی تقسیم پر اطلاق ہونے والی مختلف فیسوں اور چارجز میں نظرِ ثانی کرکے نمایاں کمی کا فیصلہ کیا گیا جبکہ فارم ہاؤسز پر انڈسٹریل کی جگہ رہائشی چارجز وصول کرنے کا فیصلہ کیا گیا۔
سی ڈی اے بورڈ کے اجلاس میں مشینری پول آرگنائزیشن (ایم پی او) ڈائریکٹوریٹ کی کارکردگی اور استعداد کار کو مزید بڑھانے کا فیصلہ کیا گیا جس کے تحت اسلام آباد شہر کی تعمیر و ترقی کیلئے روڈ انفراسٹرکچر، کنسٹرکشن میٹریل کی فراہمی اور جدید مشینری کی دستیابی کو یقینی بنانے کیلئے ایم پی او ڈائریکٹوریٹ کو جدید مشینری کی فراہمی کی بھی منظوری دی گئی۔
اجلاس میں سیکٹر ایچ ایٹ میں خواتین افسران کی رہائشی سہولیات کی تعمیر کیلئے کنسلٹنٹ کی خدمات حاصل کرنے کا فیصلہ کیا گیا۔ اجلاس میں اسلام آباد میٹرو بس “پشاور موڑ تا این آئی آئی اے” کیلئے دیگر تعمیراتی مدت میں توسیع کی منظوری دی گئی ۔
اجلاس میں فیصلہ کیا گیا کہ پشاور موڑ تا این آئی آئی اے” کیلئے میٹرو منصوبے کا پی سی ون سی ڈی اے ڈی ڈبلیو پی میں پیش کیا جائے گا۔
اجلاس میں مالیاتی سال 25-2024 کے مالیاتی سال کی نظرثانی شدہ سفارشات کا تفصیلی جائزہ لیا گیا۔سی ڈی اے بورڈ کے اجلاس میں مالیاتی سال 25-2024 کیلئے نظرثانی شدہ بجٹ تخمینہ کی منظوری دی گئی۔ اجلاس میں چیئرمین سی ڈی اے نے ریونیو اور واجبات کی وصولی کو مزید بہتر بنانے کیلئے ڈی جی ریکوری تعینات کرنے کی ہدایت کی۔ چیئرمین سی ڈی اے نے ڈی جی ریکوری سی ڈی اے میں پہلے سے قائم شدہ ریکوری یونٹ کی سرپرستی کے ساتھ روزانہ کی بنیاد پر سی ڈی اے کی ریونیو اور واجبات کی وصولی پر رپورٹ پیش کرنے کی ہدایت کی۔
اجلاس میں چیئرمین سی ڈی اے نے سی ڈی اے کے مستقل اخراجات کیلئے مستقل ذرائع آمدن اور وسائل تلاش کرنے اور اس حوالے سے جامع حکمت عملی تیار کرنے کی ہدایت بھی کی۔
اس موقع پر چیئرمین سی ڈی اے نے کہاکہ سی ڈی اے اسلام آباد کی ترقی، خوشحالی، خوبصورتی اور اس کو ملک ایک مثالی شہر بنانے کیلئے تمام وسائل بروئے کار لارہا ہے، عوام کی رہائشی، سفری اور تفریحی ضروریات کو پورا کرنے کیلئے مختلف منصوبوں پر تیزی سے کام جاری ہے۔
